ამაღელვებელი ცხოვრებისეული ისტორია-მან მამა 43 წლის შემდეგ იპოვა
შვედი მონა ლიზას ისტორია მართალია ფილმის სიუჟეტს ჰგავს, მაგრამ ეს სრული სიმართლეა.
ყველაფერი 1980 წლის ზაფხულში დაიწყო, როცა მონა ლიზას დედა კრიტზე ორი კვირით ჩავიდა დასასვენებლად. იქ ის შეხვდა ახალგაზრდას, სახელად ალექსის და მათ ერთმანეთი შეუყვარდათ.
როდესაც გოგონა შვედეთში დაბრუნდა, შეიტყო, რომ ფეხმძიმედ იყო და გადაწყვიტა ბავშვის შენარჩუნება. ის დიდხანს ცდილობდა ალექსის პოვნას, რათა შეეტყობინებინა, რომ მისგან ბავშვს ელოდებოდა, მაგრამ ამაოდ, “ალექსის” არავინ იცნობდა.
მომდევნო წლებში ის კიდევ ორჯერ დაბრუნდა ხანიაში და ისევ უშედეგო იყო ძებნა, ის ცდილობდა მოეძებნა ალექსის მეგობრები, ყველაფერს ეცადა ასევე შვედეთის საელჩოს საშუალებით, მაგრამ ვერაფერი გააწყო, რადგან სახელი “ალექსი” მამის ნამდვილი სახელი არ იყო, მან კი მისი მხოლოდ სახელი იცოდა.
“2,5 წლის ვიყავი, როდესაც ხანიაში ჩავედით მე და დედა. მამაჩემის პოვნა ვცადეთ, მაგრამ არავინ იცოდა ვინ იყო, უკვალოდ იყო გაუჩინარებული. მეორედ კრიტზე დავბრუნდით, როდესაც ვიყავი 13 წლის. ისევ ვერავის მივაკვლიეთ. მთელი ცხოვრების მანძილზე ვგრძნობდი კრიტის მიმართ აუხსნელ მიზიდულობას. ვგრძნობდი, რომ ეს ჩემი სახლი იყო.”- განაცხადა მონა ლიზამ გადაცემაში “სიმართლე ზინასთან.”
ორი წლის წინ მან განათავსა პოსტი ინტერნეტში და სწორედ მაშინ გაიცნო სტელიო ხანიადან, რომელიც მას დაპირდა, რომ დაეხმარებოდა მამის ძებნაში, მიუხედავად იმისა, რომ არ იცნობდა მას. მონა ლიზა დაბრუნდა ხანიაში და შეხვდა სტელიოს და კიდევ ერთ ქალს, მარიას, რომლის დახმარებითაც მან იპოვა მამის ახალგაზრდობის ფოტოები და მონაცემები მის შესახებ.
ამის შემდეგ სტელიომ “ალექსის” ფოტოები ინტერნეტში ატვირთა და რამდენიმე საათში მამის ნამდვილი ვინაობაც გაირკვა.
” მე ვერ აღვწერ იმ სიყვარულს, რომელსაც ვგრძნობ ხანიას მკვიდრი მოსახლეობის მიმართ მას შემდეგ, რაც ისინი დამეხმარნენ მეპოვა მამა. ხალხი აჩერებდა მამაჩემს და ეუბნებოდა, რომ მისი ქალიშვილი შვედეთიდან მას ეძებდა. შემდეგ ის ოფისში გამოიქცა სადაც მე ვიყავი და ჩვენ შევხვდით. როგორც კი შევხვდით ჩვენ ვიცანით ერთმანეთი.
პირველი, რაც მან ბერძნულად მასწავლა არის “ძალიან მიყვარხარ”.
ბევრი ვისაუბრეთ და ყველაფერზე შევთანხმდით. გარეგნულადაც და ხასიათითაც ძალიან ვგავართ ერთმანეთს. როცა პირველად შევხვდით მამაჩემმა მოიხსნა ჯვარი, რომელიც ეკეთა და მე მაჩუქა.
ჩემი ისტორია ნათელი მაგალითია იმისა, რომ არ აქვს მნიშვნელობა ვინ ხარ და რა ეროვნების… რაც ყველას სჭირდება ეს სიყვარულია და ხანიელებმა მე სიყვარული მაჩუქეს!”- თქვა მან.
ნახეთ ნაწყვეტი გადაცემიდან:
