ბრიუსელში მომხდარ თავდასხმაზე პასუხისმგებლობა არაბულენოვანმა მამაკაცმა აიღო

ბელგიის საზოგადოებრივი მაუწყებლის VRT-ის ცნობით, ორშაბათს საღამოს ბრიუსელში მოკლეს შვედი ეროვნების ორი პირი, ეჭვმიტანილი კი კვლავ თავისუფლებაშია. თავდამსხმელი შემთხვევის ადგილიდან მიიმალა და ამ დრომდე თავისუფალი რჩება, თუმცა, სოციალურ ქსელში ვირუსულად გავრცელდა ვიდეო, სადაც არაბულ ენაზე მოლაპარაკე მამაკაცმა აიღო პასუხისმგებლობა ალაჰის სახელით თავდასხმაზე, თუმცა, ხელისუფლებას ჯერ არ დაუდასტურებია ვიდეოს ავთენტურობა და დამნაშავის ვინაობა.

სროლის შედეგად მესამე ადამიანიც დაშავდა და ამჟამად მკურნალობას საავადმყოფოში გადის, იუწყება შვედური მედია. სროლის მოტივი გაურკვეველი რჩება. ინციდენტი ბელგია შვედეთის ევრო 2024-ის შესარჩევი მატჩის დროს მოხდა.

ქალაქის მერმა ფილიპ კლოზმა განცხადება გააკეთა და დაადასტურა ქუჩებში პოლიციის თანამშრომლების განლაგება საზოგადოების უსაფრთხოების უზრუნველსაყოფად. ბელგიის პრემიერ-მინისტრმა ალექსანდრე დე კროომ გამოხატა სამძიმარი და დაგმო თავდასხმა, როგორც ტერორისტული აქტი. მან ბრიუსელის მოსახლეობას სიფხიზლისკენ მოუწოდა.

გავრცელებული ინფორმაციით, ევრო 2024-ის შესარჩევი საფეხბურთო მატჩი ბელგიასა და შვედეთს შორის, რომელიც ქალაქში მიმდინარეობდა, სასწრაფოდ შეწყდა, რაც უეფამ დაადასტურა.

ფლამანდური გაზეთი Het Laatste Nieuw წერს, რომ მსროლელს ფლუორესცენტური ნარინჯისფერი ქურთუკი ეცვა. რამდენიმე მედიასაშუალება ავრცელებს სამოყვარულო ვიდეოებს, სადაც ჩანს, თუ როგორ ისვრის მამაკაცი სადგურის მახლობლად დიდი ცეცხლსასროლი იარაღის გამოყენებით.

საფრანგეთის პრეზიდენტმა ემანუელ მაკრონმა ალბანეთში სიტყვით გამოსვლისას სამძიმარი გამოხატა მომხდართან დაკავშირებით და ინციდენტი შეაფასა, როგორც მორიგი “ისლამისტური ტერორისტული თავდასხმა.”