განგაში პატრაში ავტომანქანაში მარტო დატოვებული ორი წლის ბავშვის გამო

გავრცელებული ინფორმაციით  პატრაში, ერთ- ერთ ქუჩაზე განგაში შეიქმნა, რადგან გამვლელებმა იქვე გაჩერებულ ავტომანქანაში მარტო დატოვებული ბავშვი შენიშნეს.

როგორც შემდეგ გაირკვა,  ბავშვის მშობლები აფთიაქში შესასვლელად გაჩერდნენ და როდესაც მანქანიდან გადმოვიდნენ, გასაღები ბავშვთან ერთად მანქანაში დატოვეს, თუმცა კარის დახურვისას მანქანა ავტომატურად ჩაიკეტა.

წყვილი პანიკამ მოიცვა, რადგან მათი ორი წლის ბიჭი უკან, საბავშვო სავარძელში  იჯდა და შიგნიდან იყო ჩაკეტილი, თვითონ კი მანქანის გაღებას ვერ ახერხებდნენ.

სასწრაფოდ შეატყობინეს  სახანძრო- სამაშველო ბრიგადას, რომლებიც დაუყოვნებლივ მივიდნენ შემთხვევის ადგილზე და  შეძლეს მანქანის გაღება.

საბედნიეროდ ბავშვს არაფერი დაშავებია და ის უვნებელი გამოიყვანეს.