თესალონიკი: მოქალაქემ ნაგავთან ერთად შემთხვევით ოქროს ნივთები და ძვირფასეულობა გადაყარა
წარმოუდგენელი ფაქტი მოხდა დღეს, ნაშუადღევს თესალონიკში.
გავრცელებული ცნობით, მუნიციპალიტეტის ერთ-ერთმა მაცხოვრებელმა ნაგავთან ერთად ურნაში შემთხვევით ჩააგდო ჩანთა, რომელშიც ოქრო და ძვირფასი ნივთები ჰქონდა შენახული.
მას შემდეგ, რაც დასუფთავების სამსახურის ჯგუფმა ნაგვის ურნა დაცალა და გავიდა, მოქალაქემ რამდენიმე წუთში გააცნობიერა თუ რა გააკეთა. საბედნიეროდ დასუფთავების მანქანა იმავე ტერიტორიაზე იმყოფებოდა, ამიტომ ჯგუფს სასწრაფოდ აცნობეს მომხდარის შესახებ და სთხოვეს დახმარება ნივთების მოძებნაში და პატრონისთვის დაბრუნებაში.
დაუყოვნებლივ მოხდა სამსახურის თანამშრომლების მობილიზაცია და ძებნის მთელი ოპერაცია დაიწყო.
აღნიშნულის შესახებ აცნობეს პოლიციასაც, რომელიც სასწრაფოდ მივიდა თესალონიკის მუნიციპალიტეტის ნარჩენების გადასატანი სადგურის მიდამოში. მანქანა, რომლითაც “ძვირფასი” ნაგავი გაიტანეს, შემთხვევის ადგილიდან სადგურზე გადაიყვანეს, პოლიციის თანამშრომლების თანდასწრებით დაცალეს და ჩანთა იპოვეს, რომელიც ისევ მფლობელს დაუბრუნდა.
