საბერძნეთის პოლიცია კრიმინალური დაჯგუფების 5 წევრის ფოტოებს და პირად მონაცემებს ასაჯაროებს
საბერძნეთის პოლიცია კრიმინალური დაჯგუფების 5 წევრის ფოტოებს და პირად მონაცემებს ასაჯაროებს
საბერძნეთის პოლიცია საჯაროდ ავრცელებს იმ დაჯგუფების 5 წევრის ფოტოებს და პირად მონაცემებს, რომელიც ძარცვავდნენ მოხუცებულ ადამიანებს სამხრეთ გარეუბნებში. ისინი ხან ელექტროენერგიის მუშაკებად და ხან ლიფტის ტექნიკურ მუშაკებად ასაღებდნენ თავს.
დაჯგუფების წევრები 8 ნოემბერს, გამთენიისას, ანო ლიოსიაში დააკავეს, მათი ნაძარცვი მაშინ 190.000 ევროდ შეფასდა.
ბრალდებულები არიან:
მუსტაფა კონსტანდინო, დაბადებული 31/10/1996
მუსტაფა ანდონი, დაბადებული 28/01/2002
კამბერის ხრისტო, დაბადებული 06/01/1999
ალკოს ღეორღიოს, დაბადებული 15/03/1984
და ჯერ ძებნაში გამოცხადებული მუსტაფა იოანნი, დაბადებული 06/03/1994
ვინაიდან ზემოაღნიშნული დანაშაულებრივი ქმედებები შეურაცხყოფს საზოგადოებრივ წესრიგს, კონკრეტული მონაცემების და ფოტოების საჯაროდ გამჟღავნება, შესაბამისი პროკურატურის ბრძანების შემდგომ, მიზნად ისახავს, ერთის მხრივ, გამოიძიოს, გამოავლინოს ან აღძრას მსგავსი ხასიათის დანაშაულები, რომლებიც ჩადენილია ბრალდებულების მიერ და, მეორე მხრივ, საზოგადოების დასაცავად მსგავსი დანაშაულებრივი ქმედებებისგან, განმარტავს თავის განცხადებაში პოლიცია, რომელიც მოქალაქეებს მოუწოდებს: „დაუკავშირდნენ სამხრეთ-აღმოსავლეთ ატიკის უსაფრთხოების სამსახურს 210-9692920 და ატიკის უსაფრთხოების სამსახურს 210-6411111, ნებისმიერი შესაბამისი ინფორმაციის მისაწოდებლად. აღნიშნულია, რომ კომუნიკაციის ანონიმურობა და კონფიდენციალურობა გარანტირებულია“.
ბრალდებულების კრიმინალური მეთოდი:
დაჯგუფების კრიმინალური აქტივობა 2023 წლის ივლისში დაიწყო. მისმა წევრებმა დილისა და შუადღის საათები აირჩიეს იმ სახლების მოსაძებნად, სადაც მოხუცებული ადამიანები ცხოვრობდნენ.
როდესაც მიაკვლევდნენ მომდევნო მსხვერპლს, დაჯგუფების წევრები კარზე აზარინებდნენ და წარადგენდნენ საკუთარ თავს ელექტროენერგიის კომპანიის თანამშრომლებად ან ლიფტის ტექნიკურ მუშაკებად, რომლებიც მოხუცებს ეწვივნენ, სავარაუდოდ, ელექტროენერგიის გაჟონვის ან ლიფტის გაუმართაობის გამო.
როდესაც დაზარალებულებს დაარწმუნებდნენ და მოახერხებდნენ სახლში შესვლას, დაჯგუფების ერთ-ერთი წევრი მსხვერპლის ყურადღებას სხვადასხვა საბაბით იქცევდა (ელექტრო დანადგარებისა თუ საყოფაცხოვრებო ტექნიკის შემოწმებით), რათა სხვა წევრებს სწრაფი და მეთოდური მოძრაობებით საშუალება ჰქონოდათ სახლი გაეჩხრიკათ ძვირფასეულობების და თანხის მოსაპოვებლად.
სხვა შემთხვევაში, პოლიციელების ცნობით, ისინი სახლებისკენ მიმავალ ხანდაზმულებს ადამიანებს გზაში კორპუსთან მიახლოვებულებს აედევნებოდნენ და ზემოთაღნიშნული მეთოდით უახლოვდებოდნენ მათ.
ერთ შემთხვევაში კი მოხუცებულის დარწმუნება იმდენად მოახერხეს, რომ ფული და ძვირფასეულობა მან ალუმინის ქაღალდში თავისივე ხელით ჩააბარა ბრალდებულებს, რათა ისინი „დაეცვა“ მოსალოდნელი სამუშაოებისგან.
წინასწარი გამოძიებით ალიმოში, გლიფადაში, ვულაში, ვულიაგმენსა და ვარქიზაში ქურდობის ცხრა შემთხვევაა გახსნილი.
აღნიშნულია, რომ ბრალდებულები მსგავსი დანაშაულისთვის ხელისუფლებას წარსულშიც აწუხებდნენ.
