სერესში პოლიციამ მიგრანტების არალეგალური გადაყვანის ფაქტზე ქართველი მამაკაცი დააკავა

საბერძნეთის უშიშროების ქვედანაყოფის, დანაშაულის პრევენციისა და აღკვეთის ჯგუფის პოლიციის თანამშრომლებმა სერესის ტერიტორიაზე ემიგრანტთა უკანონო გადაყვანის ბრალდებით 21 წლის ქართველი მამაკაცი დააკავეს.

გავრცელებული ცნობით,  აღნიშნული პიროვნება სერესის მიმდებარე ტერიტორიაზე პოლიციელებმა ავტომანქანის მართვისას შენიშნეს.

სამართალდამცავების დანახვისას მამაკაცმა გაქცევის მიზნით ავტომანქანით რამდენიმე სახიფათო მანევრი შეასრულა, პოლიციის მანქანას შეეჯახა და გაჩერდა, რა დროსაც  მისი დაკავება მოხდა.

როგორც გაირკვა, დაკავებამდე  ცოტა ხნით ადრე მან მანქანიდან ჩამოსვა ერაყის მოქალაქე რვა ემიგრანტი, რომელთაგან ხუთი 8-დან 14 წლამდე ასაკის არასრულწლოვანი იყო, რომლებიც ფულადი ანაზღაურების სანაცვლოდ ქვეყნის ტერიტორიაზე უკანონოდ შეიყვანა.

ავტომობილის ჩხრეკის დროს, რომლითაც ტრეფიკიორი მართვის მოწმობის გარეშე გადაადგილდებოდა, ამოღებულია მობილური ტელეფონი.

დაკავებული მის წინააღმდეგ აღძრული საქმით სერესის პროკურატურაში გადაიყვანეს.