ჰიდრა- საბერძნეთის განსაცვიფრებელი სილამაზის კუნძული

არგო სარონიკის ყურეში, ათენიდან გემით სულ რაღაც ორი საათის სავალ მანძილზე მდებარე კუნძული ჰიდრა თავისი განსაცვიფრებელი ბუნებრივი სილამაზით და აქტიური საპორტო ქალაქით ყოველთვის იყო შთაგონების ადგილი მხატვრებისთვის, მუსიკოსებისთვის და უბრალოდ თავისუფალი სულის მქონე ადამიანებისთვის.

კუნძულის ისტორია:

შუა საუკუნეებში კუნძული უკაცრიელი იყო. აქ მხოლოდ XVIII საუკუნეში გაჩნდა მოსახლეობა ქრისტიანი ალბანელების სახით, რომლებიც ამ უკაცრიელ და პრაქტიკულად დაუსახლებელ კუნძულზე თურქებისგან დევნას გაექცნენ.

მე-19 საუკუნისთვის კუნძულმა განვითარების პიკს მიაღწია. ეს იყო თურქებისგან პრაქტიკულად დამოუკიდებელი, ნამდვილი საზღვაო ძალა, 30 ათასზე მეტი მოსახლით.

საბერძნეთის დამოუკიდებლობის ომის დროს კუნძულის მკვიდრებმა საკუთარი ხარჯებით აღჭურვეს თავიანთი სავაჭრო გემები არტილერიით და შექმნეს საკუთარი საზღვაო ესკადრილია. ეს ესკადრილია დიდი წარმატებით იბრძოდა თურქების წინააღმდეგ, მოიპოვა რამდენიმე მნიშვნელოვანი საზღვაო გამარჯვება და მნიშვნელოვანი წვლილი შეიტანა საბერძნეთის დამოუკიდებლობის საქმეში.

თუმცა შემდეგ, მშვიდობიან დროს, კუნძულის მცხოვრებლებში მეკობრულმა სულმა გაიღვიძა, მათ არ სურდათ დამორჩილებოდნენ საბერძნეთის პირველ ოფიციალურ მთავრობას. ჰიდრა, ციკლადებთან ერთად, აუჯანყდა საბერძნეთის მთავრობას, თუმცა, ეს აჯანყება ძალიან სწრაფად იქნა ჩახშობილი.

საბერძნეთის დამოუკიდებლობის მოპოვების შემდეგ, უძველესი პორტი პირეა აღდგა და საზღვაო მარშრუტები და  ყველა მნიშვნელოვანი სავაჭრო პუნქტი თანდათან გადავიდა პირეაში, რის შემდეგაც ჰიდრამ დაკარგა თავისი პირვანდელი მნიშვნელობა.

კუნძული საერთაშორისოდ ცნობილია როგორც პოეტისა და სიმღერების ავტორის ლეონარდ კოენის მუზა და მისი  ნავსაყუდელი, ის გამორჩეულია შემოქმედებისა და სილამაზის მასაზრდოებელი რაღაც უხილავი ძალით, რომელიც აშკარად იგრძნობა ამ თვალწარმტაცი კუნძულის მონახულებისას.

ჰიდრას თავისებურ უნიკალურობას ანიჭებს ის ფაქტი, რომ კუნძული სრულიად თავისუფალია მანქანებისგან, მოტოციკლებისა და ველოსიპედებისგანაც კი, ასე რომ, ვიზიტორებს აქ გადაადგილება შეუძლიათ მხოლოდ ფეხით, ვირებით ან წყლის ტაქსით, რომელთა საშუალებითაც კუნძულის  შორეულ პლაჟებზე გადადიან.

ჰიდრას ულამაზეს მთავარ ქალაქში მოხეტიალე მნახველები ხვდებიან განსაცვიფრებელ ნეოკლასიკურ სახლებს, მომხიბვლელ მუზეუმებს და იდილიური ცხოვრების თვალწარმტაც სცენებს საბერძნეთის კუნძულზე.

ქალაქიდან გამომავალი საფეხმავლო ბილიკებით  ვიზიტორებს შეუძლიათ მიაღწიონ კლდეებზე განლაგებულ ისტორიულ მონასტრებს, პანორამული ხედებით კუნძულზე და ქალაქზე ქვემოთ.

კუნძულზე უამრავი თვალწარმტაცი პლაჟია. მათ შორის ავლაკი, მანდრაკი და კამინი ჰიდრას პორტიდან ფეხით სავალ მანძილზეა მათთვის, ვისაც ქალაქთან ახლოს ყოფნა სურს.

თუ განმარტოებასა და სიმშვიდეს ეძებთ, შეგიძლიათ პორტიდან წყლის ტაქსით გადახვიდეთ უფრო იზოლირებულ პლაჟებამდე, როგორიცაა აგიოს ნიკოლაოსი, მოლოსი და კაუმიტი.

აგიოს ნიკოლაოსი, მანდრაკი და კამინი ორგანიზებული პლაჟებია, სადაც არის შეზლონგები და ქოლგები, აქვეა ასევე პლაჟის ბარებიც.

თუ გადაწყვეტთ სანაპიროზე წასვლას, რომელიც არ არის ორგანიზებული, აუცილებლად თან იქონიეთ წყალი და საკვები.

ჰიდრას პორტში ან ავლაკისა და კამინისკენ მიმავალ გზაზე არის ტავერნები, რომლებიც ვიზიტორებს უგემრიელესი ტრადიციულ ბერძნულ კერძებით უმასპინძლდებიან.

ჰიდრას მზით გაჟღენთილი პლაჟები მას საზაფხულო მოგზაურობისთვის შესანიშნავ ლოკაციად აქცევს, მაგრამ მისი ბუნებრივი სილამაზე და კოსმოპოლიტური ქალაქი, რომელიც სავსეა მაღაზიებით, მუზეუმებითა და ბუტიკებით, ასევე იძლევა შესაძლებლობას ხანმოკლე მოგზაურობისთვის მთელი წლის განმავლობაში.

მიუხედავად იმისა, რომ განსაცვიფრებელი კუნძული საკმარისად ახლოს არის ათენთან, ერთდღიანი გასეირნების მოსაწყობად, ქალაქის გულში მდებარე სასტუმრო Casa Melenia Hydra შესანიშნავი ვარიანტია საცხოვრებლად, თუ ღამის გათევას გადაწყვეტთ. ღამისთევა საშუალებას გაძლევთ არ გამოტოვოთ არაფერი, რასაც კუნძული სთავაზობს მნახველს.

მშვენიერი გარე ტერასით ჰიდრას აღმოსავლეთ და დასავლეთ ფერდობებზე და სასტუმრო ოთახებით, რომლებიც ფუფუნებისა და კომფორტის შესანიშნავი კომბინაციაა, Casa Melenia Hydra განასახიერებს კუნძულის მშვიდ დახვეწილობას.

სასტუმრო მუშაობს მთელი წლის განმავლობაში, ასე რომ თქვენ შეგიძლიათ ისარგებლოთ ყველა იმ სიკეთით, რასაც კუნძული სთავაზობს სტუმრებს წლის ნებისმიერ დროს. ბერძნული სტუმართმოყვარეობით გამორჩეული პერსონალი დაგხვდებათ პორტშიც კი, რომ დააბინავოს თქვენი ბარგი და გაჩვენოთ ქალაქი.

პორტში დარჩენა იდეალურია, რადგან ყველაფერი ხელის გაწვდენაზეა, თუ გსურთ დაათვალიეროთ ულამაზესი ქალაქი ან ეწვიოთ ახლომდებარე სანაპიროს, ფეხით ან წყლის ტაქსით

როგორც კი ჰიდრას ეწვევით, მიხვდებით, თუ რატომ იზიდავდა იგი ამდენ მნახველს საკმაოდ დიდი ხნის განმავლობაში!