ბერძნების ისტორიულ მეხსიერებაში 28 ოქტომბრის „არა“ დომინირებს
ბერძნების ისტორიულ მეხსიერებაში 28 ოქტომბრის „არა“ დომინირებს
მაკედონიის უნივერსიტეტის (ΠΑΜΑΚ) კვლევის თანახმად, ბერძნების ისტორიულ მეხსიერებაში 1940 წლის 28 ოქტომბრის „არა“ კვლავ უმნიშვნელოვანეს ადგილს იკავებს, თუმცა მეორე მსოფლიო ომისა და გერმანული ოკუპაციის მთელი პერიოდის შესახებ საბერძნეთის მოქალაქეებს საკმარისი ინფორმაცია არ აქვთ.
გამოკითხულთა 70%-ზე მეტი 1940–1944 წლების მთავარ სიმბოლოდ „არა“-ს დღეს ასახელებს. ამასთან, 40% შიმშილობას იხსენებს, 37% – სიკვდილით დასჯის შემთხვევებს, ხოლო 30% – წინააღმდეგობის მოძრაობას. აღსანიშნავია, რომ ათიდან ოთხ ადამიანს მეტი ინფორმაციის მიღება სურს ოკუპანტებთან თანამშრომლობის, კოლაბორაციონიზმის, შესახებ.
კვლევამ ისტორიული ცოდნის გავრცელების მხრივ სკოლების სუსტი როლიც გამოავლინა: გამოკითხულთა მხოლოდ 12% მიიჩნევს, რომ 1940-1944 წლების შესახებ სკოლაში ბევრი რამ ისწავლება. შედარებისთვის, წიგნები 29%-მა, ოჯახი – 21%-მა, ხოლო ინტერნეტი – 17%-მა დაასახელა ცოდნის მნიშვნელოვან წყაროდ.
კვლევის ავტორების შეფასებით, ისტორიული მეხსიერება მხოლოდ ეროვნული სიმბოლოებისა და საიუბილეო თარიღების გახსენებით არ უნდა შემოიფარგლებოდეს. მნიშვნელოვანია ოკუპაციის, წინააღმდეგობის, შიმშილობისა და ბერძნებს შორის ოკუპანტებთან თანამშრომლობის რთული საკითხების შესწავლაც. განსაკუთრებული მნიშვნელობა ენიჭება კრიტიკულ აზროვნებასა და ინფორმაციის სანდოობის შეფასების უნარს.
