ბრიტანელი ქალის მკვლელობაში ბრალდებულის აღმზრდელი ოჯახი პირველ კომენტარს აკეთებს

ბრიტანელი ქალის მკვლელობაში ბრალდებულის აღმზრდელი ოჯახი პირველ კომენტარს აკეთებს

ახალი დეტალები ვრცელდება 26 წლის ავღანეთის მოქალაქის, შარიფ აჰმადზაის, წარსულის შესახებ, რომელსაც 38 წლის ბრიტანელი ქალის, ელიზაბეთ ჯეინ როსის, მკვლელობა ედება ბრალად.

ბრალდებულისთვის აღკვეთის ღონისძიების სახით წინასწარი პატიმრობის შეფარდების შემდეგ დაკავებულის აღმზრდელმა ოჯახმა პირველი კომენტარი გააკეთა.

შეგახსენებთ, რომ დაკითხვისას ბრალდებულმა დუმილის უფლება გამოიყენა და ბრალდებებზე განმარტებების მიცემაზე უარი განაცხადა.

ბრალდებული წარსულის შესახებ ისაუბრა ამერიკელმა წყვილმა, რომელიც მას ლეზვოსზე მოზარდობის პერიოდში იცნობდა და გარკვეული დროის განმავლობაში საკუთარ სახლში ჰყავდა შეფარებული.

წყვილის განცხადებით, ისინი განადგურებულნი არიან მათი აღსაზრდელის წინააღმდეგ წაყენებული ბრალდებებით და უჭირთ დაჯერება რომ იმ მოზარდს, რომელსაც დაახლოებით ათი წლის წინ იცნობდნენ, დღევანდელ ბრალდებებთან რაიმე აკავშირებს. მათი თქმით, იმ პერიოდში ახალგაზრდა მამაკაცს ძალადობრივი ქცევის ნიშნები არ გამოუვლენია.

ამერიკელი წყვილი შარიფ აჰმადზაის 2016 წელს კუნძულ ლეზვოსზე, მორიას ლტოლვილთა ბანაკში შეხვდა. მაშინ 16 წლის ბიჭი ჰუმანიტარულ ორგანიზაციებში თარჯიმნად მუშაობდა. ბანაკში გაჩენილი ხანძრის შემდეგ, როდესაც მან საცხოვრებელი დაკარგა, ოჯახმა ის და კიდევ ორი ახალგაზრდა საკუთარ სახლში შეიფარა. მოგვიანებით ისინი მას ოჯახის წევრივით ექცეოდნენ.

წყვილის თქმით, აჰმადზაი მათ „დედას“ და „მამას“ ეძახდა, ხოლო მათ შვილებთან ახლო ურთიერთობა ჰქონდა. ის მათთან თითქმის ორი წელი ცხოვრობდა.

მედიის მიერ მოპოვებული ინფორმაციის თანახმად აჰმადზაიმ ავღანეთში ოჯახის წევრები დაკარგა. მისი თქმით, მამა და ძმა თალიბებმა მოკლეს, ხოლო დედა, და და კიდევ ერთი ძმა ტერორისტული თავდასხმის შედეგად დაიღუპნენ. მოგვიანებით მან ავღანეთიდან პაკისტანის, ირანისა და თურქეთის გავლით საბერძნეთში ჩასვლა შეძლო და 2016 წელს ლეზვოსს მიაღწია.