იანნიცა: გარდაიცვალა 27 წლის ბიჭი, რომელიც სასტიკად სცემეს
იანნიცა: გარდაიცვალა 27 წლის ბიჭი, რომელიც სასტიკად სცემეს
საბერძნეთის ქალაქ იანიცაში ბარში წარმოქმნილი კონფლიქტის შემდეგ 27 წლის ბიჭს სასტიკად გაუსწორდნენ.
შემთხვევა 29 აგვისტოს, შაბათის ღამეს მოხდა. არსებული ინფორმაციით, დაპირისპირება თავდაპირველად გასართობ დაწესებულებაში დაიწყო, მოგვიანებით კი ქალაქის ცენტრში, პლასტერას ქუჩაზე გაგრძელდა.
დაპირისპირების დროს 26 წლის ბიჭმა 27 წლის ახალგაზრდას მუშტი დაარტყა. დარტყმის შედეგად ის მიწაზე დაეცა, თავი დაარტყა, გონება დაკარგა და მძიმე ქალა-ტვინის დაზიანება მიიღო.
დაშავებული სასწრაფოდ გადაიყვანეს სალონიკის „პაპაღეორღიუს“ საავადმყოფოში. ჩატარებული გამოკვლევების შედეგად დადგინდა, რომ პაციენტის მდგომარეობა კრიტიკული იყო. 27 წლის ბიჭი დღეს დილით, 8 საათზე გარდაიცვალა.
საქმეზე დაკავებული 26 წლის თავდამსხმელი, რომელიც თავდაპირველად განზრახ სხეულის დაზიანებაში იყო ბრალდებული, გასულ კვირას სასამართლოს გადაწყვეტილებით წინასწარ პატიმრობაში დატოვეს. მისი ადვოკატების ინფორმაციით, ბრალდებული აცხადებს, რომ ახალგაზრდის დაჭრა მისი განზრახვა არ ყოფილა და წარდგენილ ბრალდებას უარყოფს.
27 წლის პაციენტის გარდაცვალების შემდეგ მოსალოდნელია, რომ ბრალდებულს ბრალი დაუმძიმდეს.
წინასწარი ინფორმაციით, კონფლიქტის მიზეზი უმნიშვნელო საკითხი გახდა. გარდაცვლილი იმ ღამეს ქალთან ერთად იმყოფებოდა, ხოლო 26 წლის ბრალდებული – მეგობართან, რომელიც ინციდენტში არ ჩარეულა.
