მარათონა: სარდაფში 90 წლის წალის ცხედარი იპოვეს
მარათონა: სარდაფში 90 წლის წალის ცხედარი იპოვეს
საბერძნეთის ქალაქ მარათონაში პოლიციამ 90 წლის ქალის ცხედარი სახლის სარდაფში აღმოაჩინა. გავრცელებული ინფორმაციით, ქალის გარდაცვალებიდან დაახლოებით 10 წელი იყო გასული, თუმცა მისი სიკვდილი ოფიციალურად არ ჰქონდათ დარეგისტრირებული.
საქმე მას შემდეგ გახსნეს, რაც მოხუცი ქალის შვილიშვილმა დაახლოებით ორი კვირის წინ პოლიციას მიმართა და განაცხადა, რომ ბებიასთან კონტაქტი 10 წლის განმავლობაში არ ჰქონია. მისი ინფორმაციით, ქალი დაახლოებით ათი წლის წინ გარდაიცვალა, ხოლო დედამ და მისმა ძმამ მისი გარდაცვალება დამალეს, რათა მისი პენსიის მიღება გაეგრძელებინათ.
პოლიციაში შესული ზარის შემდეგ საჭირო პროცედურების გავლის შედეგად სახლის ჩხრეკა ჩატარდა და სწორედ ჩხრეკისას სარდაფში ადამიანის ცხედარი აღმოაჩინეს, რომელიც ივარაუდება, რომ 90 წლის ქალს ეკუთვნის. ცხედარი ნეილონის პარკში იყო გახვეული. ვინაიდან სარდაფში ძირითადად ჩონჩხის ნაშთები იყო, ადგილზე სასამართლო-სამედიცინო ექსპერტის ნაცვლად ანთროპოლოგი გამოიძახეს.
პროკურორის გადაწყვეტილებით, მოხუცის ქალიშვილი და შვილიშვილი დააკავეს გარდაცვლილი ადამიანის აღმოჩენის შესახებ ინფორმაციის არ შეტყობინების ბრალდებით. პენსიის შესაძლო უკანონოდ მიღებასთან დაკავშირებული თაღლითობის ფაქტი კი ცალკე საქმის ფარგლებში იქნება გამოძიებული.
გამოძიების ფარგლებში პოლიციამ ასევე დაადგინა, რომ მოხუცებულის საბანკო ანგარიშიდან თანხის გატანა ბოლო პერიოდამდე გრძელდებოდა. ბანკის შემოწმებისას გაირკვა, რომ მისი პენსიის ანგარიშზე ჩარიცხული თანხები 90 წლის ქალის სადებიტო ბარათის გამოყენებით კვლავ ირიცხებოდა და იხსნებოდა.
