პროგრამა “ჩემი სახლი II” დასრულდა –  პროგრამის ფარგლებში 14 000-ზე მეტი სესხის ხელშეკრულება გაფორმდა

პროგრამა “ჩემი სახლი II” დასრულდა –  პროგრამის ფარგლებში 14 000-ზე მეტი სესხის ხელშეკრულება გაფორმდა

საბერძნეთში საცხოვრებლის შეძენის ხელშეწყობის ყველაზე მასშტაბური პროგრამა „ჩემი სახლი II“ (Σπίτι μου II) ოფიციალურად 2026 წლის 31 აგვისტოს დასრულდა.

პროგრამის ფარგლებში სულ 15 097 სესხი დამტკიცდა, რომელთა საერთო ღირებულებამ 1,82 მილიარდი ევრო შეადგინა. საბოლოოდ გაფორმდა 14 114 საკრედიტო ხელშეკრულება, საერთო ღირებულებით 1,54 მილიარდი ევრო. რაც ნიშნავს, რომ დამტკიცებული სესხების 93,5% რეალურ ხელშეკრულებად იქცა.

პროგრამა საბერძნეთის განვითარების ბანკის მართვის ქვეშ ხორციელდებოდა და ითვალისწინებდა სესხის 50%-ის უპროცენტო დაფინანსებას აღდგენისა და მდგრადობის ფონდიდან, ხოლო დარჩენილ 50%-ს მონაწილე ბანკები აფინანსებდნენ.

სახელმწიფოს საერთო ფინანსურმა მხარდაჭერამ 943,2 მილიონი ევრო შეადგინა, რამაც 2,15 მილიარდ ევროზე მეტი ღირებულების უძრავი ქონების შეძენა უზრუნველყო.

ოფიციალური მონაცემებით, პროგრამის მთავარი ბენეფიციარები შედარებით დაბალი შემოსავლის მქონე ოჯახები და ახალგაზრდები იყვნენ:

• ბენეფიციარების 66,6%-ის წლიური შემოსავალი 24 000 ევრომდეა;
• ბენეფიციარების საშუალო ასაკი 38 წელია, ხოლო 41% 36 წლის ან უფრო ახალგაზრდაა;
• 58,45% დაქორწინებულია ან სამოქალაქო პარტნიორობაში იმყოფება;
• დაახლოებით 1 060 სესხი (7%) მარტოხელა მშობელთა ოჯახებს გადაეცა;
• 1 660-ზე მეტი ბენეფიციარი მრავალშვილიანი ოჯახის წევრია;
• პროგრამით ასევე ისარგებლა 108 შეზღუდული შესაძლებლობის მქონე პირმა.

პროგრამას მნიშვნელოვანი რეგიონული გავლენაც ჰქონდა. სესხების 37% — სულ 5 594 სესხი, 619,8 მილიონი ევროს ღირებულებით ათენისა და ცენტრალური მაკედონიის ფარგლებს გარეთ გაიცა.

შეძენილი საცხოვრებლების საშუალო საბაზრო ღირებულებამ 152 100 ევრო, ხოლო საშუალო ფართობმა 88,5 კვადრატული მეტრი შეადგინა.

საბერძნეთის მთავრობის განცხადებით, პროგრამამ მიზანს მიაღწია და განსაკუთრებით იმ მოქალაქეებს დაეხმარა, რომლებსაც ჩვეულებრივ საბანკო იპოთეკურ სესხებზე შეზღუდული წვდომა ჰქონდათ. ხელისუფლება აცხადებს, რომ საცხოვრებლის ხელმისაწვდომობის პოლიტიკა გაგრძელდება და ამ მიმართულებით სხვადასხვა პროგრამისთვის 6,5 მილიარდი ევრო არის გათვალისწინებული.

მთავრობის წარმომადგენლების შეფასებით, „ჩემი სახლი II“-ის დასრულების მიუხედავად, საბერძნეთში ხელმისაწვდომ საცხოვრებელზე მუშაობა გაგრძელდება, განსაკუთრებული აქცენტით ახალგაზრდებსა და ოჯახებზე.