საბერძნეთში 6,86 მილიონმა ადამიანმა უფასო პრევენციული კვლევები ჩაიტარა
საბერძნეთში 6,86 მილიონმა ადამიანმა უფასო პრევენციული კვლევები ჩაიტარა
საბერძნეთის ჯანდაცვის მინისტრის მოადგილის, ირინი აღაპიდაკის განცხადებით, ქვეყნის მასშტაბით 6 860 000 მოქალაქემ უფასოდ ჩაიტარა პრევენციული სამედიცინო გამოკვლევები პროგრამა „პროლამვანო“ („Προλαμβάνω“) ფარგლებში.
აღნიშნული განცხადება გაკეთდა ევროკავშირის აღდგენისა და მდგრადობის ფონდის პროგრამის დასრულებასთან დაკავშირებით. აღაპიდაკიმ აღნიშნა, რომ ინიციატივამ საბერძნეთის ჯანდაცვის სისტემაზე მნიშვნელოვანი სოციალური გავლენა მოახდინა.
პროგრამის ფარგლებში მოქალაქეებს ჩაუტარდათ უფასო სკრინინგული კვლევები სარძევე ჯირკვლის, საშვილოსნოსა და მსხვილი ნაწლავის კიბოს, ასევე გულ-სისხლძარღვთა დაავადებების ადრეული გამოვლენისთვის.
პროგრამის ერთ-ერთი მნიშვნელოვანი მიმართულება იყო ასევე ჯანმრთელობის ცენტრების განახლება და თანამედროვე სამედიცინო ტექნიკით აღჭურვა. განსაკუთრებული ყურადღება დაეთმო ბავშვებში ჭარბი წონისა და სიმსუქნის წინააღმდეგ ბრძოლას.
აღაპიდაკის განცხადებით, აღდგენის ფონდმა ჯანდაცვის სფეროში მნიშვნელოვანი ცვლილებები მოიტანა და პრევენციული მედიცინა უფრო მეტი მოქალაქისთვის ხელმისაწვდომი გახადა. მისი თქმით, პროგრამამ პრაქტიკულად აჩვენა, რომ ჯანდაცვა შესაძლებელია „ყველა ოჯახამდე მივიდეს“.
