ოდისეას დიმასს სპორტსმენებისთვის დოპინგური პრეპარატების მიწოდების საქმეზე ბრალი წაუყენეს – ბრალდებული აკრძალულ ნივთიერებებს არასრულწლოვან შვილსაც აძლევდა
ოდისეას დიმასს სპორტსმენებისთვის დოპინგური პრეპარატების მიწოდების საქმეზე ბრალი წაუყენეს – ბრალდებული აკრძალულ ნივთიერებებს არასრულწლოვან შვილსაც აძლევდა
პიროს დიმასის ძმას, 58 წლის ოდისეას დიმასს, სპორტსმენებისთვის აკრძალული ნივთიერებების მიწოდებისა და რეალიზაციის საქმეზე ბრალი წაუყენეს.
საბერძნეთის პროკურატურის ინფორმაციით, მას ბრალად ედება აკრძალული ნივთიერებების უკანონო შეძენა, შენახვა და რეალიზაცია, ასევე ფარმაცევტული პრეპარატების შესახებ კანონმდებლობის დარღვევა. გამოძიების თანახმად, ძალოსნობის მწვრთნელი სპორტსმენებს აკრძალულ პრეპარატებს 2024 წლის აპრილიდან აწვდიდა. ამასთან, გავრცელებული ინფორმაციით, ანაბოლურ სტეროიდებს საკუთარ არასრულწლოვან შვილსაც აძლევდა.
საქმეში განსაკუთრებულ ყურადღებას იპყრობს არასრულწლოვანი სპორტსმენის შემთხვევა, რომელსაც შეჯიბრების დროს აკრძალული ნივთიერება აღმოაჩნდა. აღნიშნული ფაქტის გამო სანქციები როგორც მწვრთნელს, ისე სპორტსმენს დაეკისრათ.
გამოძიების ფარგლებში, ატიკის რეგიონში ჩატარებული ჩხრეკის შედეგად პოლიციამ 871 ერთეული აკრძალული პრეპარატი და დოპინგური ნივთიერება, სპორტსმენების 17 ბარათი, ხელნაწერი ჩანაწერები, მობილური ტელეფონი და 15 000 ევრო ნაღდი ფული ამოიღო.
მედიკამენტების ეროვნული სააგენტოს განცხადებით, ამოღებულ პრეპარატებს საბერძნეთში გამოყენებისა და რეალიზაციის ნებართვა არ ჰქონდათ და ადამიანის ჯანმრთელობისთვის საზიანოა.
