საბერძნეთი საზოგადოებრივი ტრანსპორტის შშმ პირების საჭიროებებზე მორგებას იწყებს
საბერძნეთი საზოგადოებრივი ტრანსპორტის შშმ პირების საჭიროებებზე მორგებას იწყებს
ათენის სატრანსპორტო კომპანია ΣΤΑ.ΣΥ-მ ხელი მოაწერა ხელშეკრულებას კალითეას სადგურზე (ხაზი 1 – ყოფილი ΗΣΑΠ) ხელმისაწვდომობის გაუმჯობესების პროექტის დასაწყებად. სამუშაოების მიზანია მგზავრებისთვის, განსაკუთრებით კი შშმ პირებისა და შეზღუდული მობილობის მქონე ადამიანებისთვის, უფრო უსაფრთხო და მარტივი გადაადგილების უზრუნველყოფა.
პროექტს განახორციელებს კომპანია „ΜΠΕΚΡΗΣ – ΚΑΛΟΓΕΡΟΠΟΥΛΟΣ Ο.Ε.“, რომლის ღირებულება შეადგენს 132 625 ევროს (დღგ-ს გარეშე). სამუშაოების დაწყებამდე მომზადდა სპეციალური კვლევა, რომელმაც სადგურში საჭირო ცვლილებები განსაზღვრა.
გათვალისწინებულია:
- საფეხმავლო ხიდის იატაკის შეცვლა, რათა გაუმჯობესდეს გადაადგილება ეტლით მოსარგებლეებისა და უსინათლო მგზავრებისთვის;
- კიბეების მოაჯირების განახლება და დამატებითი საყრდენების მოწყობა;
- უსინათლოთა მიმართულების მიმანიშნებელი ბილიკებისა და პლატფორმებზე გამაფრთხილებელი ზედაპირების მოწყობა;
- არსებული პანდუსების გაუმჯობესება, მათ შორის იატაკის, განათებისა და ნიშნების განახლება;
- სადგურის საინფორმაციო ნიშნების მოდერნიზაცია;
- დაბრკოლებებისა და სახიფათო კონსტრუქციების აღმოფხვრა;
- განათების სისტემის გაუმჯობესება უსაფრთხო გადაადგილებისთვის.
პროექტის დასრულების ვადა 12 თვეა.
კალითეას სადგურის განახლება ΣΤΑ.ΣΥ-ის უფრო ფართო პროგრამის ნაწილია, რომელიც ათენის მეტროს ხაზი 1-ის (კიფისიიდან პირეამდე) ყველა სადგურის ხელმისაწვდომობის გაუმჯობესებას ითვალისწინებს. მსგავსი სამუშაოები დაგეგმილია ხაზის დანარჩენ 23 სადგურზეც, საერთო ბიუჯეტით 7,2 მილიონი ევრო.
