საბერძნეთი: 22 ივლისს ქვეყანაში ხანძრის გაჩენის უკიდურესი რისკია
საბერძნეთი: 22 ივლისს ქვეყანაში ხანძრის გაჩენის უკიდურესი რისკია
საბერძნეთის ეროვნული მეტეოროლოგიური სამსახურის (EMY) მიერ გავრცელებული ინფორმაციის თანახმად, 22 ივლისს ქვეყნის აღმოსავლეთ ნაწილში ექსტრემალური სიცხე შენარჩუნდება. თესალიაში ტემპერატურა 43°C-მდე, ხოლო ათენში და აღმოსავლეთ პელოპონისოზე 41–42°C-მდე მოიმატებს. უკიდურესად მაღალი ტემპერატურისა და ძლიერი, ცხელი ქარების გამო ქვეყანაში გამოცხადებულია ნარინჯისფერი მეტეოროლოგიური გაფრთხილება.
სამოქალაქო დაცვის გენერალურმა სამდივნომ მოსახლეობას მოუწოდა, მოერიდონ მზეზე ხანგრძლივ ყოფნას, მიიღონ საკმარისი რაოდენობის წყალი, დარჩნენ გრილ სივრცეებში და განსაკუთრებული ყურადღება მიაქციონ ბავშვების, ხანდაზმულებისა და ქრონიკული დაავადებების მქონე პირების უსაფრთხოებას.
ხელისუფლებამ სახელმწიფო უწყებები, მუნიციპალიტეტები და რეგიონული სამსახურები საგანგებო მზადყოფნაში გადაიყვანა, რადგან მაღალი ტემპერატურის, ძლიერი ქარისა და დაბალი ტენიანობის ფონზე ტყის ხანძრების გაჩენისა და სწრაფი გავრცელების რისკი უკიდურესად მაღალია.
დღეს ათენში, ვიოტიაში, ფთიოტიდაში, არგოლიდასა და კორინთიაში გამოცხადებულია ხანძრის საფრთხის უმაღლესი – მეხუთე კატეგორია (Red Code), ხოლო ქვეყნის კიდევ რამდენიმე რეგიონში, მათ შორის როდოსზე, მოქმედებს ძალიან მაღალი – მეოთხე კატეგორიის გაფრთხილება.
სიცხის გამო 13:00-დან 17:00 საათამდე ათენში, თესალიაში და აღმოსავლეთ პელოპონისოზე შეჩერდება ღია ცის ქვეშ შესრულებული ფიზიკური სამუშაოები, მათ შორის სამშენებლო, ტექნიკური და საკურიერო საქმიანობა მოტოციკლებითა და ველოსიპედებით. შეზღუდვის დარღვევისთვის დამსაქმებლებს თითოეულ თანამშრომელზე 2 000 ევროს ოდენობის ჯარიმა დაეკისრებათ.
სამოქალაქო დაცვის სამსახური მოქალაქეებს მოუწოდებს, არ დაანთონ ცეცხლი ღია სივრცეში, არ გამოიყენონ ნაპერწკლების წარმომქმნელი მოწყობილობები და ხანძრის შემჩნევის შემთხვევაში დაუყოვნებლივ დარეკონ სახანძრო სამსახურის ნომერზე 199.
