გარდაიცვალა ევი ღატიდუს დედა – სტუდენტი, რომელიც 1997 წელს სასტიკად მოკლეს
გარდაიცვალა ევი ღატიდუს დედა – სტუდენტი, რომელიც 1997 წელს სასტიკად მოკლეს
72 წლის ასაკში გარდაიცვალა როდი ღატიდუ, 21 წლის მედიცინის სტუდენტის, ევი ღატიდუს დედა. ევი 1997 წელს საბერძნეთის ქალაქ ლარისაში სასტიკად მოკლეს. მას დანით 104 ჭრილობა მიაყენეს. მკვლელის ვინაობა კი დღემდე დადგენილი არ არის.
ოჯახი წლების განმავლობაში იბრძოდა იმისთვის, რომ დამნაშავე დასჯილიყო და ევის მკვლელობის საქმეზე სამართლიანობა აღდგენილიყო. ამ ბრძოლაში ოჯახს ეხმარებოდნენ ადვოკატი ნიკოლეტა ბასდეკი და აწ უკვე გარდაცვლილი კრიმინოლოგი იანნის დიამანდისი.
როდი ღატიდუს გარდაცვალების შესახებ ნიკოლეტა ბასდეკიმ სოციალურ ქსელში გაავრცელა ინფორმაცია. გარდაცვლილს ადვოკატმა ემოციური პოსტი მიუძღვნა, სადაც ხაზი გაუსვა, რომ როდი იქ შეხვდებოდა თავის ქალიშვილ ევის და, შესაძლოა, სწორედ თავად ეთქვა სამოთხეში ევის ვინ არის მისი მკვლელი.
ევი ღატიდუ 21 წლის, წარმოშობით დრამადან, თესალიის უნივერსიტეტის მედიცინის ფაკულტეტის მეოთხე კურსის სტუდენტი იყო და ლარისაში ცხოვრობდა.
სტუდენტი 1997 წლის 27 სექტემბრის ღამეს საკუთარ ბინაში მოკლეს. მისი ცხედარი ოთხი დღის შემდეგ, საწოლში იპოვეს. ახალგაზრდა ქალს სხეულზე 104 დანით მიყენებული ჭრილობა აღენიშნებოდა.
საქმეზე დააკავეს 43 წლის მამაკაცი, რომელიც ევიმ ევანგელურ ეკლესიაში გაეცნო. მამაკაცმა მას ქორწინება სამჯერ შესთავაზა, თუმცა სტუდენტმა მისი წინადადება სამივეჯერ უარყო. უკანასკნელი შეთავაზება მკვლელობამდე რამდენიმე დღით ადრე გაკეთდა.
საქმე 1999 წელს დაიხურა, რადგან გამოძიებამ საკმარისი მტკიცებულებები ვერ მოიპოვა. მოგვიანებით საქმის მასალები ხელახლა გამოიძიეს და 2003 წელს ეჭვმიტანილი სასამართლოს წინაშე წარდგა.
2005 წელს ვოლოსის შერეულმა ნაფიც მსაჯულთა სასამართლომ იგი ერთხმად დამნაშავედ სცნო და უვადო თავისუფლების აღკვეთა მიუსაჯა.
თუმცა 2007 წლის იანვარში ლარისის სააპელაციო სასამართლომ 43 წლის მამაკაცი ერთხმად გაამართლა, რითაც პირველი ინსტანციის გადაწყვეტილება სრულად გააუქმა.
ევი ღატიდუს მკვლელობის საქმე დღემდე ერთ-ერთ ყველაზე ბურუსით მოცულ მკვლელობად რჩება, ხოლო მისი ოჯახის მთავარი კითხვა: ვინ მოკლა 21 წლის სტუდენტი, პასუხგაუცემელია.
