მაზონაკის გარდაცვალების საქმე: მნიშვნელოვანი მოწმეები და სატელეფონო ზარები
მაზონაკის გარდაცვალების საქმე: მნიშვნელოვანი მოწმეები და სატელეფონო ზარები
გიორგოს მაზონაკისის გარდაცვალების საქმეზე სამართალდამცველები მისი სიცოცხლის ბოლო წუთებში განვითარებულ მოვლენებს იკვლევენ. ყურადღება გამახვილებულია ექიმებისა და კლინიკის თანამშრომლების მოქმედებებზე, პლაზმოფერეზის აპარატის სიგნალებზე, ასევე სასწრაფო დახმარების გამოძახებამდე განხორციელებულ სატელეფონო ზარებზე.
გამოძიებისთვის მნიშვნელოვანი შეიძლება აღმოჩნდეს 53 წლის ექთნის ჩვენება, რომელიც პროცედურის დროს კლინიკაში იმყოფებოდა. გავრცელებული ინფორმაციის თანახმად მან შეამჩნია, რომ მაზონაკისს ხელი უცნაურად შეერხა და ექიმ იოანა ღაკას უთხრა, რომ პაციენტი კარგად არ გამოიყურებოდა. მისი თქმით ექიმმა უპასუხა, რომ თავად იყო ექიმი და მას ამის შეფასების უფლება არ ჰქონდა. ექთანს, რომელიც კლინიკაში სამკურნალო მასაჟებსაც ატარებდა, ახლო მომავალში დაკითხავენ.
გამომძიებლები ასევე სწავლობენ პლაზმოფერეზის აპარატის ჩანაწერებს, რადგან არსებული ინფორმაციით, მოწყობილობა პროცედურის დროს განმეორებით აფიქსირებდა გამაფრთხილებელ სიგნალებს.
კიდევ ერთი მნიშვნელოვანი გარემოება უკავშირდება დეფიბრილატორს. გავრცელებული ინფორმაციით, ექიმმა იოანა ღაკამ აპარატის მწარმოებელთან ორჯერ დარეკა, რათა მოწყობილობის გამოყენებასთან დაკავშირებით ინსტრუქცია მიეღო. საუბრები ხმამაღალ რეჟიმში მიმდინარეობდა, რათა კლინიკაში მყოფ სხვა პირებსაც მოესმინათ მითითებები.
გამოძიების ყურადღების ცენტრშია ასევე 16:15 საათზე განხორციელებული სატელეფონო ზარი, რომელიც სასწრაფო დახმარების გამოძახებამდე რამდენიმე წუთით ადრე შედგა. კლინიკიდან დაუკავშირდნენ კერძო საავადმყოფოს ანესთეზიოლოგს და ჰკითხეს, შეიძლებოდა თუ არა პაციენტისთვის დამატებითი მედიკამენტის მიცემა მას შემდეგ, რაც მას სედაციური პრეპარატი და მისი ანტიდოტი უკვე ჰქონდა მიღებული.
გამოძიება ასევე სწავლობს მაზონაკისის მიერ გარდაცვალებამდე ერთი დღით ადრე გაგზავნილ შეტყობინებას, რომელშიც ის პლაზმოფერეზის პროცედურისა და მისი ღირებულების შესახებ დამატებით ინფორმაციას ითხოვდა.
ამასთან, მოწმდება, რა პროცედურა ჩაუტარდა მომღერალს კლინიკაში პლაზმოფერეზამდე ერთი დღით ადრე და რამდენად საკმარისი იყო პროცედურებს შორის დროის ინტერვალი.
