სურსათის უვნებლობისთვის აუცილებელია სამაცივრე ჯაჭვის უწყვეტობის დაცვა 

სურსათის უვნებლობისთვის აუცილებელია სამაცივრე ჯაჭვის უწყვეტობის დაცვა 

საბერძნეთის სურსათის კონტროლის ორგანო (ΕΦΕΤ) ხაზს უსვამს სურსათის სათანადო ტემპერატურაზე შენახვის მნიშვნელობას. აღნიშნული საკითხი განსაკუთრებით აქტუალური გახდა მას შემდეგ, რაც ევროპის რამდენიმე ქვეყანაში დაფიქსირდა კიბერშეტევები, რომლებმაც გავლენა მოახდინა სურსათის მწარმოებელი საწარმოებისა და საცალო ვაჭრობის ობიექტების (სუპერმარკეტები და სხვა) სამაცივრე სისტემების მუშაობაზე.

ΕΦΕΤ-ის განცხადებით, სურსათის უვნებლობის ერთ-ერთი ძირითადი წინაპირობაა სამაცივრე ჯაჭვის უწყვეტობის უზრუნველყოფა წარმოებიდან, ტრანსპორტირებისა და შენახვის ეტაპებიდან დაწყებული, საბოლოო მომხმარებლისთვის პროდუქტის მიწოდებამდე.

ევროკავშირის სურსათის უვნებლობის სისტემის ფარგლებში, სურსათის ბიზნესოპერატორები, მათ შორის მალფუჭებადი პროდუქტების რეალიზაციით დაკავებული ობიექტები, პასუხისმგებელნი არიან ბაზარზე განთავსებული სურსათის უსაფრთხოებაზე. შესაბამისად, თუ არსებობს ეჭვი, რომ გაგრილების პროცესის შეწყვეტამ შესაძლოა პროდუქტის უვნებლობაზე უარყოფითი გავლენა მოახდინა, ბიზნესოპერატორები ვალდებულნი არიან, აღნიშნული პროდუქცია ბაზრიდან ამოიღონ.

ამასთან, თუ კიბერშეტევის შედეგად სამაცივრე სისტემების მუშაობა შეფერხდა ან არსებობს ასეთი შეფერხების საფრთხე, კომპანიებმა ამის შესახებ შესაბამისი ინფორმაცია ΕΦΕΤ-საც უნდა მიაწოდონ. კომპეტენტურ ორგანოებს, მათ შორის ΕΦΕΤ-ს, უფლება აქვთ, გააკონტროლონ სურსათის უვნებლობის მოთხოვნების შესრულება და შესაბამისი შემთხვევების მართვა კოორდინაცია გაუწიონ.

კიბერუსაფრთხოების ეროვნული ორგანოს რეკომენდაციების საფუძველზე, ΕΦΕΤ ბიზნესოპერატორებს მოუწოდებს, მიიღონ შემდეგი პრევენციული ზომები:

• სამაცივრე სისტემების მართვის მოწყობილობები გათიშონ საჯარო ინტერნეტისგან, ხოლო დისტანციური წვდომა უზრუნველყონ მხოლოდ დაცული VPN კავშირის მეშვეობით, მრავალფაქტორიანი ავთენტიფიკაციის გამოყენებით;
• შეცვალონ მოწყობილობებზე წინასწარ დაყენებული პაროლები და რეგულარულად დააინსტალირონ უსაფრთხოების განახლებები;
• შეცვალონ ის მოწყობილობები, რომელთა ტექნიკურ მხარდაჭერას მწარმოებელი კომპანია აღარ უზრუნველყოფს.