კუნძულ კოსსა და სიროსზე ფსიქიკური ჯანმრთელობის 2 ახალი ცენტრი 2,8 მილიონი ევროთი დაფინანსდება
კუნძულ კოსსა და სიროსზე ფსიქიკური ჯანმრთელობის 2 ახალი ცენტრი 2,8 მილიონი ევროთი დაფინანსდება
საბერძნეთის სამხრეთ ეგეოსის რეგიონის ხელისუფლებამ კოსსა და სიროსზე ფსიქიკური ჯანმრთელობის ორი ახალი ცენტრის შექმნისთვის ჯამში 2,8 მილიონი ევროს დაფინანსება გამოყო.
დაფინანსება ევროკავშირის სახსრებიდან გამოიყოფა და ორი ახალი ცენტრის მუშაობას ორი წლის განმავლობაში უზრუნველყოფს. ცენტრებს ასევე ექნებათ მობილური ჯგუფები, რომლებიც მომსახურებას გაუწევენ იმ ადამიანებსაც, რომლებსაც გადაადგილება უჭირთ ან საკუთარ სახლში ზრუნვა ესაჭიროებათ.
კოსზე 1,4 მილიონი ევრო მოხმარდება დემენციისა და ალცჰაიმერის დაავადების მქონე ადამიანებისთვის სპეციალიზებული ცენტრის შექმნას. ცენტრი დაახლოებით 85 ბენეფიციარს გაუწევს სამედიცინო მეთვალყურეობას, თერაპიულ და ფსიქოსოციალურ დახმარებას, ასევე სხვადასხვა აქტივობისა და ყოველდღიური მხარდაჭერის სერვისებს. გათვალისწინებულია სამი მობილური ჯგუფის მუშაობაც, რომლებიც საჭიროების შემთხვევაში პაციენტებს სახლში მოემსახურებიან.
კიდევ 1,4 მილიონი ევრო სიროსზე ფსიქიკური ჯანმრთელობის ყოვლისმომცველი ცენტრის შესაქმნელად გამოიყოფა. ცენტრი მოემსახურება აუტიზმისა და ნეიროგანვითარებითი დარღვევების მქონე ბავშვებს, მოზარდებსა და ზრდასრულებს. მომსახურება გაფართოებული სამუშაო საათებით იქნება ხელმისაწვდომი და სპეციალისტებისგან შემდგარი მულტიდისციპლინური გუნდი უზრუნველყოფს როგორც ცენტრში, ისე ბენეფიციარების ოჯახურ გარემოში დახმარებას.
ახალი სერვისები მხოლოდ პაციენტებზე არ იქნება ორიენტირებული. მნიშვნელოვანი ნაწილი დაეთმობა ოჯახების, მშობლებისა და მომვლელების კონსულტირებას, სწავლებასა და მხარდაჭერას, რათა მათ ხანგრძლივი ზრუნვის პროცესში საჭირო დახმარება მიიღონ.
სამხრეთ ეგეოსის რეგიონის გუბერნატორის, გიორგოს ხაძიმარკოსის, განცხადებით, ევროპული დაფინანსების მთავარი მიზანი მისი მოქალაქეებისთვის პირდაპირი დახმარების სახით ზრუნვის, უსაფრთხოებისა და ღირსების უზრუნველყოფაა.
