მხოლოდ მიწისძვრას შეეძლო გამოეწვია ასეთი ნგრევა

მხოლოდ მიწისძვრას შეეძლო გამოეწვია ასეთი ნგრევა

ალკმინის 22 ნომერში მდებარე კორპუსის ჩამონგრევიდან მეორე დღეს პეტრალონას მაცხოვრებლები გაოცებას და შიშს გამოხატავენ და აცხადებენ, რომ დაუჯერებელია გვერდით კორპუსში სარემონტო სამუშაოებს ამხელა კატასტროფა გამოეწვია.

შენობის ნანგრევები ამჟამადაც დაკვირვების ქვეშაა, ტერიტორიაზე შესვლა შეზღუდულია და სპეციალისტები იკვლევენ ნგრევის მიზეზებს. 

კაცი, რომელმაც თავად იხილა თუ როგორ ჩამოინგრა შენობა, იხსენებს შემზარავ მომენტს და აცხადებს, რომ თავიდან ეგონა მიწისძვრა იყო: “ჯერ მსხვრევის ხმა შემომესმა, ფანჯრების შუშები ჩაიმსხვრა. შემდეგ კორპუსმა ზემოდან დაიწყო ჩამოშლა. ვიფიქრე მიწისძვრა იყო, დავუძახე გარშემომყოფებს: “მიწისძვრაა, შეხედეთ ფანჯრების მინები იმსხვრევა, კონდიციონერები, აივნიები იშლება..” დიდი დრო არ დასჭირვებია კორპუსის მიწასთან გასწორებას.. 20 წამი ალბათ. ბოლოს ჰაერში მტვერიღა ჩანდა.. გარეთ გამოვცვივდით, ყველა ყვიროდა. თითქოს ქვიშაზე იყო აშენებული ეს კორპუსი.”

როგორც თვითმხილველი აცხადებს აღნიშნული კორპუსი 1970 წელს აშენდა: “ამ კორპუსის ქვეშ გარაჟებისთვის და სარდაფებისთვის საძირკველი გათხარეს. რამდენადაც ვიცი საძირკველი 3 მეტრი ჰქონდა კორპუსს, ამათ კიდევ 6 მეტრის სიღრმეზე გათხარეს, შემდეგ ბეტონი ჩაასხეს გასამაგრებლად, მაგრამ იმხელა სიმძიმე აწვებოდა, რომ ბეტონი დაიძრა და მიწამ წაიღო. პეტრალონაზე კორპუსებს უკვე მიწა და წყალი აქვს შემდგარი.”