ენდომეტრიოზი: რას უნდა მიაქციონ ყურადღება ქალებმა
ენდომეტრიოზი: რას უნდა მიაქციონ ყურადღება ქალებმა
ენდომეტრიოზი დაავადებაა, რომლის დროსაც ენდომეტრიუმის ანუ საშვილოსნოს შიგნითა გარსის მსგავსი ქსოვილი არაბუნებრივ ადგილას ვითარდება. ენდომეტროიდულ წარმონაქმნებს უმეტესად უკონტურო ინფილტრატის ფორმა აქვს, ზოგჯერ კი კვანძს ან სქელი, ყავისფერი სითხით სავსე კისტურ წარმონაქმნს წააგავს.
ენდომეტრიოზის მიზეზები დღემდე დაუდგენელია. არსებობს მისი განვითარების რამდენიმე თეორია, მაგრამ დაავადების პათოგენეზს სრულყოფილად ვერც ერთი მათგანი ვერ ხსნის.
ენდომეტრიოზის მთავარი სიმპტომია მცირე მენჯის ღრუში ტკივილი, რომელიც განსაკუთრებით ძლიერდება მენსტრუაციის დაწყებამდე 2-3 დღით ადრე და გასტანს მენსტრუალური ციკლის პერიოდში. ენდომეტრიოზზე ეჭვი უნდა მიიტანონ ქალებმა რომლებსაც აღენიშნებათ ჩამოთვლილთაგან ერთი ან მეტი სიმპტომი:
- მენჯის ქრონიკული ტკივილი
- მენსტრუალურ ციკლთან დაკავშირებული ტკივილი (დისმენორეა), რომელიც გავლენას ახდენს პაციენტის ყოველდღიურ აქტივობებსა და ცხოვრების ხარისხსზე
- ღრმა ტკივილი სქესობრივი კავშირის დროს ან შემდეგ
- მენსტრუალურ ციკლთან დაკავშირებული ან ციკლური გასტროინტესტინური პრობლემები, კერძოდ მტკივნეული დეფეკაცია
- საშარდე სისტემის მენსტრუალური ან ციკლური სიმპტომები, კერძოდ სისხლი შარდში ან მტკივნეული შარდვა
- ზემოთ მოცემულ ერთ ან ორ ფაქტორთან ასოცირებული უშვილობა
