მარღარიტა პაპანდრეუ 103 წლის ასაკში გარდაიცვალა
მარღარიტა პაპანდრეუ 103 წლის ასაკში გარდაიცვალა
103 წლის ასაკში გარდაიცვალა მარღარიტა პაპანდრეუ, მწერალი და საბერძნეთის ყოფილი პრემიერ-მინისტრის, ანდრეას პაპანდრეუსის მეორე მეუღლე. წყვილი 1951 წელს დაქორწინდა და ქორწინებაში 1989 წლამდე იმყოფებოდა.
მარღარიტა პაპანდრეუსა და ანდრეას პაპანდრეუს ოთხი შვილი ჰყავდათ.
მარღარიტა პაპანდრეუ 1923 წლის 30 სექტემბერს აშშ-ში, ილინოისის შტატის ქალაქ ოუკ-პარკში დაიბადა. თავდაპირველად ჟურნალისტიკას სწავლობდა, შემდეგ კი მინესოტას უნივერსიტეტში საზოგადოებრივი ჯანდაცვის მიმართულებით მაგისტრატურა გაიარა. სწორედ იქ გაიცნო 1947 წელს მომავალი მეუღლე.
იგი აქტიურად მონაწილეობდა ქალთა უფლებებისა და მშვიდობის საკითხებში. დააარსა საბერძნეთის ქალთა კავშირი (ΕΓΕ) და რვა წლის განმავლობაში მისი პრეზიდენტი იყო. ასევე იყო მრავალი სტატიისა და წიგნის ავტორი.
მარღარიტა და ანდრეას პაპანდრეუები თავდაპირველად აშშ-ში, მინესოტაში ცხოვრობდნენ, მოგვიანებით კი კალიფორნიაში გადავიდნენ. წყვილმა სამოქალაქო ქორწინება 1951 წლის 30 აგვისტოს, რენოში გააფორმა.
