მასშტაბური ოპერაცია ბერძნული საზღვაო გამანადგურებლის გადასარჩენად
თესალონიკის ახალ სანაპიროზე მასშტაბური ოპერაცია მოეწყო ისტორიული გამანადგურებლის “ველოსის” (ისარი) გადასარჩენად, რომელსაც გუშინდელი უამინდობით გამოწვეული ძლიერი ღელვის გამო სერიოზული ზიანი მიადგა.
ისტორიულ გემს, რომელსაც მცურავ მუზეუმსაც უწოდებენ, ზღვის ღელვის დროს სანაპიროზე, ბეტონის ნავსაყუდელთან შეჯახებებისას უკანა მხარეს უზარმაზარი ბზარი გაუჩნდა. ინჟინრები ცდილობენ აღადგინონ ისტორიული გემის მთლიანობა რამდენადაც ეს შესაძლებელია და აღრიცხონ ის ზარალი, რომელიც მას მიადგა.
პორტში, სადაც გამანადგურებელია მიმაგრებული, იმყოფება ასევე მისაბმელიანი სატვირთო, რომელიც სპეციალური დამცავი ბაგირებით ეხმარება გემს ძლიერი ქარის დროს სტაბილურობის შენარჩუნებაში და იცავს მას შემდგომი დაზიანებისგან.
შემთხვევის ადგილზე ასევე იმყოფებიან მყვინთავები, რათა დაადგინონ ხომ არ დაზიანდა გემის წყლის ქვეშ მყოფი ნაწილიც.
დღეს ამ რეგიონში ამინდის პირობები მკვეთრად გაუმჯობესდა და მიუხედავად იმისა, რომ ქარი ჯერ კიდევ ძლიერია, ღელვა ზღვაზე გუშინდელთან შედარებით საგრძნობლად შესუსტდა.
საბერძნეთის საზღვაო ძალების გადამდგარი ადმირალი და SYRIZA-ს ეროვნული თავდაცვის დეპარტამენტის ხელმძღვანელი ევანგელოს აპოსტოლაკისი თავისი განცადებაში ითხოვს მოვლენის გამომწვევი მიზეზების დაუყოვნებლივ გამოძიებას და ხაზს უსვამს, რომ აუცილებელია ისტორიული გემი გადატანილი იქნეს უახლოეს პორტში მის დასაცავად და ასევე დაუყოვნებლივ ჩატარდეს საჭირო სამუშაოები მიყენებული ზიანის აღსადგენად.
გარდა ამისა, ის აღნიშნავს, რომ სახელმწიფოს ვალდებულებაა, შეინარჩუნოს ეს ისტორიული გემი, რომელიც წარმოადგენს დიქტატურის წინააღმდეგ ბრძოლის სიმბოლოს და მოახდინოს მისი გადატანა შესაბამის ადგილას, რომელიც ეკუთვნის, ანუ საზღვაო მემკვიდრეობის პარკში.
