საბერძნეთი: მოსალოდნელია ტემპერატურის მკვეთრი კლება, ჩრდილოეთის ძლიერი ქარები და თოვლი პარნითაზე
საბერძნეთი: მოსალოდნელია ტემპერატურის მკვეთრი კლება, ჩრდილოეთის ძლიერი ქარები და თოვლი პარნითაზე
საბერძნეთში მომდევნო 48 საათის განმავლობაში ამინდი მკვეთრად გაუარესდება. ტემპერატურა საგრძნობლად დაიკლებს, გაძლიერდება ჩრდილოეთის ქარი, ხოლო ქვეყნის მთიან რეგიონებში თოვლია მოსალოდნელი. სინოპტიკოსების პროგნოზით, თოვლი შესაძლოა ათენის მახლობლად მდებარე პარნითას მთის მწვერვალზეც მოვიდეს.
ეტეოროლოგის, გიორგოს ცატრაფილიასის განცხადებით, წვიმა ძირითადად აღმოსავლეთ და სამხრეთ საბერძნეთშია მოსალოდნელი. ნალექმა შესაძლოა დამატებითი სირთულეები შექმნას იმ რეგიონებში, რომლებიც ბოლო დღეებში უამინდობამ დააზარალა და სადაც აღდგენითი სამუშაოები ამ დრომდე მიმდინარეობს.
პარასკევს, 16 ოქტომბერს წვიმა ქვეყნის კონტინენტური ნაწილის უმეტეს რეგიონში ძირითადად შუადღის შემდეგ არის მოსალოდნელი. საღამოს, ტემპერატურის შემდგომი კლების ფონზე, ზღვის დონიდან 1 300 მეტრზე მაღლა მდებარე მთიან ადგილებში მოთოვს.
კონტინენტურ საბერძნეთში ჰაერის ტემპერატურა 19-20 გრადუსამდე, კუნძულ კრეტაზე, იონიის კუნძულებსა და დოდეკანისას კუნძულებზე კი 21-22 გრადუსამდე მოიმატებს.
ატიკაში მოსალოდნელია მცირე ნალექი. საღამოს სუსტი თოვლი შესაძლოა პარნითას მწვერვალზეც მოვიდეს. ტემპერატურა 10-18 გრადუსის ფარგლებში იმერყევებს, ჩრდილოეთის ქარის სიძლიერე კი 6 ბოფორს მიაღწევს.
სალონიკში წვიმაა მოსალოდნელი. თერმაიკოსის ყურეში დაუბერავს 5 ბოფორი სიმძლავრის ქარი, ტემპერატურა კი 18 გრადუსამდე მოიმატებს.
შაბათს ტემპერატურა კიდევ უფრო იკლებს და ქვეყნის ზოგიერთ რეგიონში ერთნიშნა მაჩვენებლებს მიაღწევს. ჩრდილოეთ და მთიან რაიონებში ტემპერატურა შესაძლოა ნულ გრადუსსაც ჩამოსცდეს. მოსალოდნელია წვიმა და ცალკეულ ადგილებში ჭექა-ქუხილი, განსაკუთრებით აღმოსავლეთ კონტინენტურ საბერძნეთსა და ეგეოსის ზღვაში. ევიასა და როდოსზე ნალექი შუადღემდე შენარჩუნდება.
კვირიდან ამინდი გაუმჯობესდება. გამოიდარებს და ტემპერატურა მოიმატებს.
