საბერძნეთში რომას საზოგადოებრივი ინტეგრაციის საკითხი მწვავე პრობლემად რჩება
საბერძნეთში რომას საზოგადოებრივი ინტეგრაციის საკითხი მწვავე პრობლემად რჩება
რომას ეთნიკური ჯგუფის ინტეგრაციის საკითხი ბერძნულ საზოგადოებრივ სისტემაში კვლავ მნიშვნელოვან გამოწვევად რჩება განსაკუთრებით განათლებისა და ჯანდაცვის სფეროებში. ბოლო წლებში განხორციელებული ინტეგრაციის პროგრამების მიუხედავად, პრობლემები კვლავ არსებობს და პერიოდულად მწვავე კონფლიქტებში გადადის.
2025 წელს გამოქვეყნებული კვლევის მიხედვით, რომელიც 562 რომა ოჯახს მოიცავდა, გამოკითხულთა 33%-ს განათლების ძალიან დაბალი დონე ან ფუნქციური გაუნათლებლობის ნიშნები აქვს. მათგან 14% აცხადებს, რომ წერა-კითხვა არ იცის, ხოლო 19%-ს დაწყებითი სკოლა საერთოდ არ დაუსრულებია ან სკოლაში არ უვლია.
პრობლემურია ასევე რომას ეთნიკური ჯგუფის ურთიერთობა სამედიცინო დაწესებულებებთან. კვლევაში გამოკითხულთა 51% სამედიცინო პერსონალთან ურთიერთობას „შედარებით დამაკმაყოფილებლად“ აფასებს, 27% „საკმაოდ დამაკმაყოფილებლად“, ხოლო 17% უკმაყოფილოა.
ექსპერტების შეფასებით, ურთიერთგაუგებრობას ხელს უწყობს დაბალი განათლების დონე, ჯანმრთელობის შესახებ განსხვავებული კულტურული შეხედულებები, სტერეოტიპები და მხარეებს შორის არსებული უნდობლობა. კვლევები ასევე მიუთითებს, რომ აღნიშნული ეთნიკური ჯგუფის წარმომადგენლების ნაწილს საავადმყოფოების მიმართ შიში ან უნდობლობა აქვს და სამედიცინო დახმარებას ხშირად მხოლოდ მძიმე მდგომარეობის დროს მიმართავს.
მნიშვნელოვანია ასევე სკოლებსა და საავადმყოფოებში მომხდარი ძალადობრივი ინციდენტებიც. პრობლემის გადაწყვეტა მხოლოდ კონფლიქტების კრიტიკით შეუძლებელია და საჭიროა სისტემური კვლევა, განათლების ხელმისაწვდომობის გაუმჯობესება, ჯანდაცვის სერვისებთან ადაპტაცია და ეფექტური ინტეგრაციის პოლიტიკა.
საბერძნეთის მოქმედი ეროვნული სტრატეგია 2021–2030 წლებისთვის სწორედ რომა ჯგუფების სოციალური ინტეგრაციის, განათლების, დასაქმებისა და ჯანდაცვის ხელმისაწვდომობის გაუმჯობესებას ისახავს მიზნად. თუმცა პროგრამების პრაქტიკაში განხორციელება კვლავ მნიშვნელოვან გამოწვევად რჩება.
