საბერძნეთი 9 ქვეყანასთან ერთად ევროკავშირის ემისიებით ვაჭრობის სისტემის რეფორმას ითხოვს
საბერძნეთი 9 ქვეყანასთან ერთად ევროკავშირის ემისიებით ვაჭრობის სისტემის რეფორმას ითხოვს
ემისიებით ვაჭრობა არის საბაზრო მექანიზმი, რომელიც ემსახურება ატმოსფეროში სათბურის აირების (მაგ. CO₂) გლობალურ შემცირებას. იგი მუშაობს პრინციპით „დააბინძურე და გადაიხადე“.
საბერძნეთი იტალიასთან, პოლონეთთან, ბულგარეთთან, კვიპროსთან, ჩეხეთთან, ესტონეთთან, უნგრეთთან, რუმინეთთან და სლოვაკეთთან ერთად ევროკავშირის ემისიებით ვაჭრობის სისტემის (EU ETS) გადახედვის ინიციატივას შეუერთდა.
ქვეყნის წარმომადგენლები მიიჩნევენ, რომ კლიმატური მიზნების შესრულებასთან ერთად აუცილებელია ევროპული ეკონომიკის კონკურენტუნარიანობის, ენერგეტიკული უსაფრთხოებისა და მრეწველობის დაცვაც.
საბერძნეთი რეფორმის ფარგლებში შვიდ ძირითად პრიორიტეტს ასახელებს: ემისიების შემცირების რეალისტურ გეგმას, ევროპული ინდუსტრიის კონკურენტუნარიანობის დაცვას, წევრი ქვეყნების სპეციფიკის გათვალისწინებას, ETS2-ის სოციალური გავლენის შემცირებას, ნახშირორჟანგის ბაზრის სტაბილურობას, საზღვაო გადაზიდვებისა და პორტების მხარდაჭერას და საჰაერო მიმოსვლის ხელმისაწვდომობის შენარჩუნებას.
ათენის პოზიციით, ევროკავშირის კლიმატური პოლიტიკა უნდა აერთიანებდეს გარემოს დაცვას, ეკონომიკურ განვითარებას, ენერგეტიკულ უსაფრთხოებასა და სოციალურ სტაბილურობას, რათა მწვანე გარდამავალი პროცესი იყოს როგორც ეფექტიანი, ისე სამართლიანი.
