საბერძნეთისა და კვიპროსის შეთანხმების გეოპოლიტიკური მნიშვნელობა და თურქეთის პოზიცია პროექტის მიმართ
საბერძნეთისა და კვიპროსის შეთანხმების გეოპოლიტიკური მნიშვნელობა და თურქეთის პოზიცია პროექტის მიმართ
საბერძნეთსა და კვიპროსს შორის წყალქვეშა ელექტროგადამცემი კაბელის (GSI – Great Sea Interconnector) პროექტი ახალ ეტაპზე გადავიდა. პროექტში უმსხვილესი ფრანგული საინვესტიციო ფონდი Meridiam ჩაერთო და საკონტროლო წილი შეიძინა, რაც პროექტს როგორც ფინანსურ, ისე გეოპოლიტიკურ მნიშვნელობას მატებს.
ამ მიზნით საბერძნეთის გარემოს დაცვისა და ენერგეტიკის მინისტრმა, სტავროს პაპასტავრუმ, მაისში პარიზში გამართა შეხვედრები Meridiam-ის ხელმძღვანელებთან, რათა კომპანიის მონაწილეობა პროექტში საბოლოოდ შეთანხმებულიყო.
პროექტს საბერძნეთის მთავრობა განსაკუთრებულ მნიშვნელობას ანიჭებს. პრემიერ-მინისტრ კირიაკოს მიცოტაკისს სურს, რომ თურქეთის წინააღმდეგობის მიუხედავად, კაბელის მშენებლობა არ შეჩერდეს. მიუხედავად იმისა, რომ კვიპროსში პროექტის მიმართ გარკვეული სკეპტიციზმი არსებობს, საბერძნეთი მის განხორციელებას აქტიურად უჭერს მხარს.
Meridiam-ი მსოფლიოში ერთ-ერთი წამყვანი ინფრასტრუქტურული საინვესტიციო ფონდია, რომლის საინვესტიციო პორტფელი დაახლოებით 100 მილიარდ ევროს შეადგენს. კომპანიას უკვე აქვს მსგავსი მასშტაბის პროექტების წარმატებული გამოცდილება, მათ შორის NeuConnect დიდი ბრიტანეთისა და გერმანიის დამაკავშირებელი წყალქვეშა ელექტროკაბელის მშენებლობა.
Meridiam-ის მონაწილეობა მიუთითებს, რომ პროექტს არა მხოლოდ პოლიტიკური, არამედ ეკონომიკური პერსპექტივაც აქვს. ამასთან, პროექტი კვლავ გარკვეული რისკების წინაშე დგას, რადგან თურქეთი წარსულში აქტიურად ეწინააღმდეგებოდა ზღვის ფსკერზე კაბელის გაყვანას.
ამ ეტაპზე Meridiam-მა, ფრანგულმა კომპანია Nexans-მა და საბერძნეთის ელექტროგადამცემი სისტემის ოპერატორმა ΑΔΜΗΕ (IPTO) თანამშრომლობის მემორანდუმს მოაწერეს ხელი. მათი პირველი პრიორიტეტი ზღვის ფსკერის კვლევების დაჩქარებაა, რაც პროექტის შემდეგი ფაზის დაწყებისთვის აუცილებელია.
ევროპის საინვესტიციო ბანკი პროექტის დაფინანსების შესაძლებლობას განიხილავს, ხოლო GSI უკვე აღიარებულია ევროპული სტრატეგიული ინტერესის პროექტად, რაც მის მნიშვნელობას კიდევ უფრო ზრდის. საბოლოოდ, საფრანგეთის ჩართულობამ პროექტს დამატებითი საერთაშორისო მხარდაჭერა, ფინანსური სტაბილურობა და გეოპოლიტიკური წონა შესძინა.
