ბოლო 24 საათის განმავლობაში საბერძნეთში 44 ხანძრის კერა გაჩნდა
ბოლო 24 საათის განმავლობაში საბერძნეთში 44 ხანძრის კერა გაჩნდა
საბერძნეთის სახანძრო სამსახურის მიერ გავრცელებული ინფორმაციის თანახმად ჯამში 44 ხანძრის კერა დაფიქსირდა 5 აგვისტოს საღამოს 6 საათიდან 6 აგვისტოს საღამოს 6 საათამდე. 44 ხანძრიდან 36-ის გამკლავება დაუყოვნებლივ მოხერხდა, ხანძრის კერის გაღვივებიდან მალევე. თუმცა დარჩენილი 8 ხანძრის ჩასაქრობად სახანძრო სამსახური ამ დრომდე მუშაობს.
პარალელურად ადგილობრივი საგამოძიებო დანაყოფები ხანძრის გამომწვევი მიზეზების გამოძიების სამმართველოს ჯგუფებთან თანამშრომლობით ცეცხსლი გაჩენის გამომწვევ მიზეზებს იკვლევენ. ასევე მიმდინარეობს სახანძრო უსაფრთხოების წესების დაცვის კუთხით შემოწმებები რის შედეგადაც, მოქმედი კანონმდებლობის დარღვევის გამო მოქალაქეებს ოთხი ახალი ადმინისტრაციული ჯარიმა დაეკისრათ.
5 აგვისტოს კუნძულ ხიოსზე ნარჩენების დაწვისთვის ადგილობრივ მაცხოვრებელს 3 000 ევროს ოდენობის ჯარიმა დაეკისრა. იმავე დღეს, ილიას რეგიონში, პიროსის მუნიციპალიტეტში მდებარე ტყის ზონაში გრილის გამოყენებისთვის მამაკაცი 1 968,75 ევროთი დაჯარიმდა.
6 აგვისტოს კი პიერიის რეგიონში, კატერინის მუნიციპალიტეტში, ნარჩენების დაწვის გამო მოქალაქეს 2 578,12 ევროს ოდენობის ჯარიმა დაეკისრა. ასევე, დრამას მუნიციპალიტეტში იმავე დარღვევისთვის კიდევ ერთი ადგილობრივი მაცხოვრებელი 2 812,50 ევროთი დააჯარიმეს.
საბერძნეთის სახანძრო სამსახური მოსახლეობას მოუწოდებს მკაცრად დაიცვან ხანძარსაწინააღმდეგო წესები და თავი შეიკავონ ნებისმიერი ქმედებისგან, რომელმაც შესაძლოა ხანძარი გამოიწვიოს.
