სინდაღმას მეტროსადგურზე მხედველობის პრობლემის მქონე პირებისთვის ბრაილის რუკა განთავსდა
სინდაღმას მეტროსადგურზე მხედველობის პრობლემის მქონე პირებისთვის ბრაილის რუკა განთავსდა
ათენის მეტროს სადგურ „სინდაღმაზე“ მხედველობის პრობლემების მქონე პირებისთვის სპეციალური ტაქტილური რუკა განთავსდა, რომელიც მათ ქალაქის ცენტრში დამოუკიდებლად გადაადგილებაში დაეხმარება.
რუკა სადგურის პირველ მიწისქვეშა დონეზე, მუდმივი არქეოლოგიური გამოფენის დასაწყისთან მდებარეობს და მოიცავს ომონიას, მონასტირაკისა და სინდაღმას ტერიტორიებს. მასზე შეხებით შესაძლებელია მნიშვნელოვანი შენობების, მოედნების, არქეოლოგიური ძეგლებისა და მეტროს სადგურების ამოცნობა. ობიექტები განსხვავებული ფორმით, ტექსტურითა და სიმაღლით არის აღნიშნული, ასევე გამოყენებულია ბრაილის შრიფტი.
რუკაზე ასევე განთავსებულია QR კოდი, რომლის საშუალებითაც მომხმარებელს აუდიოაღწერის მოსმენა შეუძლია. პროექტში მონაწილეობდნენ ათენის მუნიციპალიტეტი, ეროვნული ტექნიკური უნივერსიტეტის კარტოგრაფიის ლაბორატორია, ΣΤΑΣΥ და მხედველობის პრობლემების მქონე პირთა ორგანიზაციების წარმომადგენლები, რომლებმაც რუკის ტესტირებაშიც მიიღეს მონაწილეობა.
პროექტი 16 სექტემბერს, ევროპული მობილობის კვირეულის ფარგლებში წარადგინეს. მისი მიზანია საზოგადოებრივი თავშეყრის ადგილების უფრო ხელმისაწვდომ და ინკლუზიურ სივრცეებად გადაკეთება.
