ბრიტანელი მედდა შვიდი ბავშვის მკვლელობაში დამნაშავედ ცნეს
ბრიტანულმა სასამართლომ შვიდი ახალშობილის განზრახ მკვლელობაში დამნაშავედ სცნო 33 წლის ექთანი ლუსი ლეტბი, რომელიც მაშინ ჩესტერის ოლქში მდებარე საავადმყოფოში მუშაობდა. აღნიშნული მკვლელობები ქალმა 2015 წლის ივნისიდან 2016 წლის ივნისის ჩათვლით ჩაიდინა. მან ჩვილი ბავშვები ინექციის საშუალებით, კანში ჰაერისა და ინსულინის შეყვანით დახოცა.
ლეტბი ასევე დამნაშავედ ცნეს საავადმყოფოს ახალშობილთა პალატაში ექვსი ბავშვის მკვლელობის მცდელობაში, იგივე მეთოდების გამოყენებით.
განყოფილების წამყვანმა კონსულტანტმა, დოქტორმა სტივენ ბრეიმ პირველად ეჭვი ლეტბის მისამართით 2015 წლის ოქტომბერში გამოთქვა, თუმცა ამას არანაირი ქმედება არ მოჰყოლია, რის შემდეგაც ქალმა კიდევ ხუთი ბავშვის მოკვლა სცადა, მათგან ორის მოკვლა მართლაც შეძლო.
ახალშობილთა განყოფილების წამყვანმა კონსულტანტმა, სადაც ლუსი ლეტბი მუშაობდა, BBC-ს განუცხადა, რომ საავადმყოფოს ხელმძღვანელობამ დროულად ვერ გამოიკვლია მედდასთან დაკავშირებული ბრალდებები და ცდილობდნენ ექიმების გაჩუმებას.
მენეჯმენტმა ასევე დააგვიანა პოლიციასთან დაკავშირება, მიუხედავად იმისა, რომ თვეების განმავლობაში აფრთხილებდნენ, რომ არსებობდა საფუძვლანი ვარაუდი, რომ მედდამ ჩვილები დახოცა.
პროკურორებმა განაცხადეს, რომ მათ სჭირდებოდათ 28 დღე განხილვისთვის, რათა გადაწყვიტონ მოითხოვონ თუ არა განმეორებითი სასამართლო განხილვა ექვს ახალ ბრალდებაზე (რომლებიც კიდევ ოთხ ახალშობილის მკლელობას მოიცავს). მათ ეს გადაწყვეტილება 15 სექტემბრამდე უნდა მიიღონ.
როდესაც გამოძიება ცდილობდა ლუსი ლეტბის საზარელი დანაშაულის მოტივის გარკვევას, განსაკუთრებული ყურადღება მიიქცია და მიკროსკოპის ქვეშ მოექცა მისი კონკრეტული კონტაქტი ერთ-ერთ ექიმთან.
პოლიცია თვლის, რომ შესაძლებელია ლუსი ლეტბი ცდილობდა ყურადღების მიპყრობას ზოგადად, მაგრამ განსაკუთრებით დაქორწინებული ექიმის, რომელთანაც მას ინტიმური ურთიერთობა ჰქონდა. შესაძლებელია, რომ მას სჭირდებოდა კარგი კომენტარების მოსმენა მის საქმიანობაზე, სურდა თავი საჭიროდ ეგრძნო და რამდენადმე აემაღლებინა თავდაჯერებულობა, როდესაც ის ავრცელებდა შეტყობინებებს კოლეგების მისამართით სადაც წერდა, რომ ძალიან წუხდა ჩვილების ბედზე, საუბრობდა მათი გარდაცვალების მიზეზებზე, ზოგიერთ შეტყობინებაში მის მიერ კი ჯერ კიდევ ცოცხალი ახალშობილების ჯანმრთელობის მდგომარეობაზე გადაჭარბებულ ზრუნვას ავლენდა და შიშობდა რომ მათ საფრთხე ემუქრებოდათ.
