კირიაკი ღრივას სასამართლო პროცესი: ოჯახის ადვოკატები განცხადებას ავრცელებენ
კირიაკი ღრივას სასამართლო პროცესი: ოჯახის ადვოკატები განცხადებას ავრცელებენ
23 სექტემბერს განახლდება 28 წლის კირიაკი ღრივას მკვლელობის საქმის განხილვა. ბრალდებული, რომელიც პირველი ინსტანციის სასამართლომ დამნაშავედ სცნო, კვლავ კორიდალოს პატიმართა ფსიქიატრიულ საავადმყოფოში იმყოფება.
სასამართლო პროცესის დაწყებამდე კირიაკი ღრივას დედის ადვოკატებმა, ელენა ძულისა და იანნის აპაციდისმა, განცხადება გაავრცელეს. ისინი საუბრობენ საქმის სახელმწიფო და სასამართლო ორგანოების მიერ წარმოებისას დაშვებულ სერიოზულ ინსტიტუციურ ხარვეზებზე და აცხადებენ, რომ ნებისმიერი შესაძლო დაფარვის ან პასუხისმგებლობის თავიდან აცილების მცდელობას წამოწევენ წინ განსახილველად.
ადვოკატების პროტესტი ძირითადად ეხება:
- ბრალდებულის ფსიქიატრიულ დაწესებულებაში ყოფნას – ადვოკატები აკრიტიკებენ ბრალდებულის ხანგრძლივ მოთავსებას კორიდალოს ფსიქიატრიულ საავადმყოფოში და მიიჩნევენ, რომ ამ საკითხთან დაკავშირებით მისი ფსიქიკური მდგომარეობის შესახებ განსხვავებული შეფასებები არსებობს.
- დედისთვის ქალიშვილის პირადი ნივთების არ გადაცემა – მათი განცხადებით, ოჯახს დღემდე არ გადასცემია გრივას ტანსაცმელი, პირადი ნივთები და მობილური ტელეფონი.
- გაუპატიურების შესაძლო ფაქტის არ გამოძიება – ადვოკატები აცხადებენ, რომ გამოძიების გაგრძელებისთვის საკმარისი მტკიცებულებები არსებობდა და საქმის ამ მიმართულებით ხელახლა შესწავლას ითხოვენ.
- სასამართლო გადაწყვეტილებებისა და მოსამართლეთა ქმედებების კრიტიკა – ისინი ეჭვქვეშ აყენებენ რამდენიმე გადაწყვეტილებას და მიიჩნევენ, რომ ზოგიერთი მოსამართლისა და სასამართლო პროცესის მონაწილეთა ქმედებებზე სათანადო რეაგირება არ მომხდარა.
- პოლიციელების პასუხისმგებლობა – ადვოკატების განცხადებით, წმინდა ანარღირონის პოლიციის განყოფილების თანამშრომლების მიმართ გამოყენებული დისციპლინური სანქციები არ იყო საკმარისი. მათი ნაწილი კვლავ პოლიციაში მსახურობს.
- 112/100-ის მუშაობა – ადვოკატები ასევე აკრიტიკებენ საბერძნეთის საგანგებო დახმარების სატელეფონო სამსახურის მუშაობას და მოქალაქეების მიმართ მომსახურების ხარისხს.
კირიაკი ღრივა 2024 წლის 1 აპრილს, წმინდა ანარღირონის პოლიციის განყოფილების წინ მოკლეს. მკვლელობამდე ის პოლიციის განყოფილებაში იმყოფებოდა და დახმარებას ითხოვდა.
მეორე ინსტანციის სასამართლო პროცესი 23 სექტემბერს დაიწყება. ოჯახის ადვოკატები აცხადებენ, რომ ისინი სამართლებრივი და ინსტიტუციური დაცვის ყველა შესაძლო მექანიზმის გამოყენებას აპირებენ და საქმის სრულყოფილ გამოძიებასა და პასუხისმგებელი პირების გამოვლენას მოითხოვენ.
