საბერძნეთის სკოლებში ცურვის გაკვეთილები IV კლასის მოსწავლეებისთვისაც სავალდებულო ხდება
საბერძნეთის სკოლებში ცურვის გაკვეთილები IV კლასის მოსწავლეებისთვისაც სავალდებულო ხდება
ახალი სასწავლო წლიდან საბერძნეთის დაწყებით სკოლებში ცურვის სავალდებულო გაკვეთილები IV კლასის მოსწავლეებზეც გავრცელდება. აქამდე პროგრამაში მხოლოდ III კლასის მოსწავლეები მონაწილეობდნენ.
საბერძნეთის განათლების, რელიგიისა და სპორტის სამინისტროს ინფორმაციით, 2025-2026 სასწავლო წელს ცურვის გაკვეთილებში 52 002 მოსწავლემ მიიღო მონაწილეობა, რაც პროგრამის დაწყების შემდეგ ყველაზე მაღალი მაჩვენებელია. შედარებისთვის, 2024-2025 სასწავლო წელს მონაწილეთა რაოდენობა 44 711 იყო, ხოლო 2023-2024 წლებში – 35 369.
განათლების მინისტრის, სოფია ზახარაკის მიერ გაკეთებული განაცხადის თანახმად, საბერძნეთისთვის, როგორც ზღვისპირა ქვეყნისთვის, ცურვა მხოლოდ ფიზიკური აღზრდის საგანი არ არის, არამედ სასიცოცხლოდ მნიშვნელოვანი უნარია. მისი თქმით, გაკვეთილები მოიცავს წყალში უსაფრთხოებისა და მაშველის საბაზისო ცოდნის ათვისების ელემენტებსაც.
ახალი საკანონმდებლო ცვლილებების თანახმად, თითოეულ დაწყებითი განათლების დირექტორატში დაინიშნება ცურვის პროგრამის კოორდინატორი, განისაზღვრება ერთი ფიზიკური აღზრდის მასწავლებელი ყოველ 10 მოსწავლეზე და უზრუნველყოფილი იქნება ყველა ბავშვის, მათ შორის სპეციალური საგანმანათლებლო საჭიროებების მქონე მოსწავლეების პროგრამაში თანაბარი მონაწილეობა.
სამინისტროს სტრატეგიული გეგმის მიხედვით, მომდევნო 3-5 წლის განმავლობაში პროექტის მიზანია, 8 წელს გადაცილებულმა ყველა მოსწავლემ შეიძინოს ცურვისა და წყალში უსაფრთხოების დაცვის აუცილებელი უნარები.
