საბერძნეთი: იონიის ზღვაში ნახშირწყალბადების კვლევის ახალი ეტაპი იწყება

საბერძნეთი: იონიის ზღვაში ნახშირწყალბადების კვლევის ახალი ეტაპი იწყება

საბერძნეთში იონიის ზღვაში ნახშირწყალბადების კვლევის ახალი ეტაპი იწყება. ამერიკული კომპანია Chevron „ბლოკ 10“-ში, კიპარისიის ყურეში, 70%-იანი წილით შევიდა, რაც რეგიონში მეორე საძიებო ბურღვის პერსპექტივას აჩენს.

ამავდროულად, მნიშვნელოვანი სამუშაოები იგეგმება კორფუს დასავლეთით მდებარე „ბლოკ 2“-ში, სადაც 2027 წლის თებერვალში საბერძნეთში ბოლო 40 წლის განმავლობაში პირველი საძიებო ბურღვის ჩატარებაა დაგეგმილი.

სპეციალისტების შეფასებით, „ბლოკ 2“-ის „ასოპოს 1“-ის რაიონში ბუნებრივი აირის მარაგი შესაძლოა 270 მილიარდ კუბურ მეტრს აღწევდეს, მაშინ როდესაც საბერძნეთის წლიური მოხმარება 6-7 მილიარდ კუბურ მეტრს შეადგენს. ბურღვის სიღრმე 4 622 მეტრი იქნება, ხოლო პროექტის ღირებულება 60-70 მილიონ ევროდ არის შეფასებული.

თუ საბადო კომერციულად მომგებიანი აღმოჩნდება, მისი განვითარებისთვის დამატებით დაახლოებით 5 მილიარდი ევროს ინვესტიცია გახდება საჭირო. ამ შემთხვევაში, ექსპერტების პროგნოზით, საბერძნეთის სახელმწიფო 20 წლის განმავლობაში დაახლოებით 10 მილიარდ ევროს შემოსავალს მიიღებს.