საბერძნეთი: ცვლილება, რომელიც ქრონიკული და ონკოლოგიური დაავადებების მქონე პაციენტებს მკურნალობის პროცესს გაუმარტივებს
საბერძნეთი: ცვლილება, რომელიც ქრონიკული და ონკოლოგიური დაავადებების მქონე პაციენტებს მკურნალობის პროცესს გაუმარტივებს
საბერძნეთში მნიშვნელოვნად გაიზარდა მოთხოვნა ძვირადღირებულ მედიკამენტებზე, რომლებსაც პაციენტები სახლში ან კერძო აფთიაქებიდან იღებენ.
მედიკამენტების სახლში მიღებასთან დაკავშირებულმა ცვლილებამ განსაკუთრებით გაამარტივა ონკოლოგიური და სხვა ქრონიკული დაავადებების მქონე პაციენტებისა და მათი ოჯახებისთვის მკურნალობის მიღების პროცესი.
თუ ადრე პაციენტებისთვის მედიკამენტების მიღების მთავარი გზა ჯანდაცვის ეროვნული ორგანიზაციის (EOPYY) აფთიაქებში მისვლა იყო, სადაც ხშირად გრძელ რიგებში დგომა უწევდათ, დღეს მათ უფრო მეტი არჩევანი აქვთ. მათ შორის მედიკამენტების სახლში მიწოდება და კერძო აფთიაქებიდან გატანა.
საბერძნეთის პრემიერ-მინისტრმა კირიაკოს მიცოტაკისმა სალონიკის საერთაშორისო გამოფენაზე გამოსვლისას აღნიშნა, რომ მძიმე დაავადებების მქონე პაციენტებისთვის მედიკამენტების სახლში მიწოდება მნიშვნელოვანი წარმატებაა.
მისი თქმით, ცვლილების შედეგად ონკოლოგიურ და მძიმე დაავადებების მქონე პაციენტებს აღარ უწევთ EOPYY-ს აფთიაქებთან ხანგრძლივ რიგებში დგომა მედიკამენტების მისაღებად.
ახალი სისტემა განსაკუთრებით მნიშვნელოვანია იმ ადამიანებისთვის, რომელთათვისაც გადაადგილება და მედიკამენტების მისაღებად სპეციალურად სამედიცინო დაწესებულებაში მისვლა დამატებით სირთულეს წარმოადგენს.
