ათენის ქუჩებში ასფალტის ტემპერატურამ 57°C გადააჭარბა
ათენის ქუჩებში ასფალტის ტემპერატურამ 57°C გადააჭარბა
ათენში ძლიერი სიცხის ტალღის ფონზე ჰაერის მაღალი ტემპერატურის გარდა, უკიდურესად გახურდა ქალაქის გზებიც. თერმული კამერებით ჩატარებულმა გაზომვებმა აჩვენა, რომ დედაქალაქის რამდენიმე უბანში ასფალტისა და სხვა მყარი ზედაპირების ტემპერატურამ 57 გრადუს ცელსიუსს გადააჭარბა.
გაზომვები ჩატარდა პედიონ ტუ არეოსის პარკში, ასევე ალექსანდრას გამზირსა და პატისიონის ქუჩაზე, რომელთა შედეგადაც დადგინდა, რომ ასფალტი, ბეტონი და სხვა სამშენებლო მასალები მზის ენერგიას დიდი რაოდენობით იწოვს და ზედაპირზე ხანგრძლივად ინარჩუნებს უკიდურესად მაღალ ტემპერატურას.
სპეციალისტების თქმით, ასეთი სიცხე არა მხოლოდ ადამიანების ჯანმრთელობას უქმნის საფრთხეს, არამედ აზიანებს გზის საფარსაც. ხანგრძლივი გადახურების შედეგად ასფალტი ფართოვდება, რაც განსაკუთრებით დატვირთულ გზებზე შესაძლოა დეფორმაციებისა და დაზიანებების მიზეზი გახდეს.
დედაქალაქის ცენტრში მარმარილოს, ბეტონისა და მეტალის ზედაპირები დღის განმავლობაში დაგროვილ სითბოს მზის ჩასვლის შემდეგაც ნელ-ნელა გამოყოფს. სწორედ ამიტომ ქალაქი ღამითაც ძალიან ცხელია, მაშინაც კი, როცა ტემპერატურა კლებას იწყებს.
მეცნიერები ამ მოვლენას „ურბანული სითბური კუნძულის“ ეფექტს უწოდებენ. მათი განმარტებით ქალაქის შენობები, გზები და სხვა ინფრასტრუქტურა დღის განმავლობაში სითბოს აგროვებს, ხოლო ღამით გამოყოფს, რის გამოც ათენის ცენტრში ღამის ტემპერატურა გარეუბნებთან შედარებით 5-6 გრადუსით მაღალი შეიძლება იყოს.
მიუხედავად იმისა, რომ ხუთშაბათიდან სიცხის ტალღის თანდათანობითი კლებაა მოსალოდნელი, ქალაქში დაგროვილი სითბო კიდევ რამდენიმე დღის განმავლობაში შეინარჩუნებს ღამის საათებში მაღალ ტემპერატურას.
