ალექსანდრუპოლი: მიღებული იქნა გადაწყვეტილება ქალაქის გენერალური საავადმყოფოს ევაკუაციის შესახებ

საბერძნეთის ჯანდაცვის სამინისტროს მიერ მიღებული იქნა გადაწყვეტილება  ალექსანდრუპოლის საავადმყოფოს ევაკუაციის შესახებ. გადაწყვეტილება მიღებულ იქნა ჯანდაცვის მინისტრის მოადგილის, მარიოს თემისტოკლეუს და EKAV-ის პრეზიდენტის, ნიკოს პაპაევსტათიუს თანდასწრებით, რომლებიც ქალაქში გაემგზავრნენ ორშაბათს საღამოს (21/8).

პაციენტების სასწრაფო დახმარების მანქანებით  გადაყვანის გადაწყვეტილება გამოწვეული იყო ხანძრის გავრცელებით, რომელიც შაბათს დილიდან გავრცელდა ალექსანდრუპოლის მუნიციპალიტეტის დასახლებებში, 01:00 საათის შემდეგ ცეცხლი უკვე ჩანდა საავადმყოფოს ტერიტორიიდანაც. წუხელ, ღამით, სულ 30 სასწრაფო დახმარების მანქანა ალექსანდრუპოლიდან კომოტინიდან, კავალადან, ქსანთიდან,  სალონიკიდან, ასევე 3 სამხედრო, EKAV-ის პრეზიდენტის ნიკოს პაპაევსტათიუს კოორდინაციით ახორციელებდნენ საავადმყოფოს ევაკუაციას.

ქალაქის სანაპირო დაცვის ინფორმაციით, 65 პაციენტი უსაფრთხოდ განათავსეს სამგზავრო საბორნე გემ “ადამანტიოს კორაისზე”, რომელიც ფაქტიურად დროებით საავადმყოფოდ გადაკეთდა.

მძიმე პაციენტებისთვის გარეთ კარვები იყო გაშლილი, ხოლო გემბანები პალატებად გადაკეთდა. ექიმების, ექთნების და ათობით მაშველის ძალისხმევა, რომლებსაც  მუდმივად გადაყავდათ პაციენტები, ზეადამიანურია.

გეგმის მიხედვით, გადაყვანები განხორციელდა მეზობელი ქალაქების საავადმყოფოებში. ევაკუაცია დაიწყო 12 ახალშობილით, რომელთაგან ერთი ინტუბირებულია, ხოლო 46 პაციენტი საკაცით კომოტინის გენერალურ საავადმყოფოშია გადაყვანილი.