დაღესტანში ბენზინგასამართ სადგურზე მომხდარი აფეთქების შედეგად 35 ადამიანი დაიღუპა
რუსეთში, ბენზინგასამართ სადგურზე მომხდარი აფეთქების შედეგად 35 ადამიანი დაიღუპა და ათობით დაშავდა.
აფეთქება დაღესტნის რეგიონალურ დედაქალაქ მახაჩკალაში, კასპიის ზღვის სანაპიროზე, ორშაბათს ადგილობრივი დროით 21:40 საათზე მოხდა.
ადგილობრივი მედიის ცნობით, ხანძარი ბენზინგასამართ სადგურთან მდებარე ავტოსარემონტო ცენტრში გაჩნდა.
საგანგებო სიტუაციების სამინისტროს ცნობით, მობილიზებულია სასწრაფო დახმარების 260 თანამშრომელი, ხოლო ყველაზე მძიმედ დაშავებულები საჰაერო გზით გადაიყვანეს მოსკოვში.
სამინისტროს ცნობით, სამაშველო სამუშაოები გრძელდება. რუსული საინფორმაციო სააგენტო „ინტერფაქსი“ იტყობინება, რომ დაღუპულთა შორის სამი ბავშვია.
ამავე ინფორმაციით, ხანძარი გავრცელდა 600 კვ.მ ფართობზე და არსებობს შემდგომი აფეთქების საშიშროება.
რიგითმა მოწმემ, რომელსაც რუსული გაზეთი იზვესტია ციტირებს, თქვა, რომ ხანძარი ბენზინგასამართი სადგურის მოპირდაპირე ავტოსადგომზე გაჩნდა.”აფეთქების შემდეგ ყველაფერი თავზე დაგვეყარა, ვეღარაფერს ვხედავდით”, – ამბობს ის.
რუსეთის საგამოძიებო კომიტეტის განცხადებით, ხანძარი მანქანის ტექნიკური სამუშაოების დროს გაჩნდა და მას აფეთქება მოჰყვა. მომხდარის გამომწვევი გარემოებების დასადგენად სისხლის სამართლის საქმე აღიძრა.
დაღესტნის რესპუბლიკა არის რუსეთის ფედერაციის 83 შემადგენელი ნაწილიდან ერთ-ერთი და ქვეყნის ყველაზე სამხრეთი ნაწილია. მახაჩკალა მოსკოვიდან დაახლოებით 1600 კილომეტრში მდებარეობს.
