თესალონიკი: ცხრა წლის ინვალიდი ბავშვი ავტობუსში დაავიწყდათ
წარმოუდგენელი ინციდენტი მოხდა თესალონიკში, როდესაც 9 წლის ინვალიდი ბავშვი ავტობუსში დაავიწყდათ.
როგორც ცნობილი გახდა, შეზღუდული შესაძლებლობების მქონე 9 წლის ბავშვი ბავშვთა კრეატიული განვითარების ცენტრში, შუადღის პროგრამაზე აპირებდა დასწრებას და სახლიდან ავტობუსში ჩვეულებრივ ჩასვეს. იმავე ავტობუსში იმყოფებოდნენ სხვა ბავშვებიც, რომლებიც ასევე ესწრებოდნენ აღნიშნულ პროგრამას.
დანიშნულების ადგილზე მისვლისას სხვა ბავშვები ჩვეულებრივ ჩავიდნენ ავტობუსიდან, ხოლო ინვალიდ ბავშვს არავინ დაეხმარა ჩასვლაში, მისი არსებობა ყველას დაავიწყდა და ის ავტობუსში დარჩა. თითქმის ოთხი საათი გავიდა მანამდე, სანამ მომდევნო ცვლის მძღოლი ავტობუსში დარჩენილ ბავშვს აღმოაჩენდა.
სალონიკის არასრულწლოვანთა დაცვის ქვედირექციის თანამშრომლების მიერ შეტანილი საჩივრის შემდეგ ავტობუსის 42 წლის მძღოლი და მისი თანმხლები 23 წლის გამცილებელი დააკავეს და მათ გაუფრთხილებლობით სხეულის დაზიანების ბრალდება წარედგინათ.
