თურქეთში დააკავეს 16 წლის მოზარდი, რომელმაც პრეზიდენტ ერდოღანის ფოტოს ულვაშები მიახატა
როგორც თურქეთის ოპოზიციასთან დაახლოებული ზოგიერთი მედიაწყარო იუწყება, სამხრეთ თურქეთში, მერსინაში, გუშინ საღამოს დააკავეს და ციხეში გადაიყვანეს 16 წლის ბიჭი, პრეზიდენტ ერდოღანის წინასაარჩევნო პლაკატზე “ჰიტლერის ულვაშის” მიხატვის გამო.
გავრცელებული ინფორმაციით გიმნაზიის მოსწავლეს ბრალი ედება თურქეთის პრეზიდენტის სასახლესთან გაკრულ პლაკატზე “ჰიტლერის ულვაშის” კალმით მიხატვასა და შეურაცხმყოფელი კომენტარების დაწერაში.
პოლიციამ ამოიღო სათვალთვალო კამერების ჩანაწერები და დაადგინა 16 წლის მოზარდის ვინაობა, რომელიც საკუთარ სახლში დააკავეს.
დაკითხვისას მან აღიარა, რომ ულვაშები დახატა, მაგრამ უარყო შეურაცხმყოფელი კომენტარის დაწერა.
დაკავებული პროკურატურას წარუდგინეს და “პრეზიდენტის შეურაცხყოფის” ბრალდებით არასრულწლოვანთა ციხეში გადაიყვანეს.
„პრეზიდენტის შეურაცხყოფა“ ერთ-ერთი ყველაზე ხშირად წარდგენილი ბრალდებაა თურქეთში, იუსტიციის სამინისტროს სტატისტიკით, 2022 წელს 16753 ასეთი შემთხვევა დაფიქსირდა.
