კარაივაზის მკვლელობა: ორი დაკავებული ხვალ სასამართლოს წინაშე წარსდგება
2021 წლის აპრილში, ალიმოში, ჟურნალისტ გიორგო კარაივაზის ცივსისხლიან მკვლელობაში და ასევე მკვლელობის მცდელობაში, ყაჩაღობასა, სხეულის დაზიანებასა და მუქარაში ბრალდებული 40 და 48 წლის ძმები სასამართლოს წინაშე წარსდგებიან, თუმცა ბრალს არ აღიარებენ და ამტკიცებენ, რომ მათ არაფერი აქვთ საერთო ცნობილი ჟურნალისტის მკვლელობასთან.
კარაივაზის მკვლელობაში ბრალდებულთა ადვოკატი ათანასია სტავრისი ამტკიცებს, რომ მათ არ აქვთ კრიმინალური წარსული და არ არიან ნასამართლევები.
ასევე, იმ მასალებთან დაკავშირებით, რომლებმაც დღის სინათლე იხილა და მკვლელობის საქმეს ორი ძმა დაუკავშირა, ადვოკატი აცხადებს, რომ მათი ბრალეულობის დამადასტურებელი მტკიცებულებები არასაკმარისია, საქმეში არსებული დეტალები ერთმანეთთან არ არის დაკავშირებული და აღინიშნება ლოგიკური ლაფსუსები.
დაკავებულები გარდა გიორგო კარაივაზის მკვლელობისა, სავარაუდოდ მოკრივის მკვლელობაშიც არიან ჩართული, ხოლო მიმდინარეობს მტკიცებულებების მოპოვება იმის დასადგენად, მონაწილეობდნენ თუ არა ისინი კიდევ ორ მკვლელობაში ვრილისიასა და გერაკაში.
საბერძნეთის პოლიციისა და უშიშროების მაღალი თანამდებობის პირების განცხადებით კარაივაზის მკვლელობისთვის ორი პირის დაკავება მხოლოდ დასაწყისია და მიმდინარეობს პროცესი მტკიცებულებების შეგროვებისა და მართლმსაჯულების წინაშე წარდგენისთვის მორალური დამნაშავის, ანუ იმ ადამიანის, ვინც უშუალოდ გასცა ჟურნალისტის მკვლელობის ბრძანება.
საქმის მასალებში მოხსენიებულია კიდევ სამი ეჭვმიტანილი , რომელთაგან ერთი ციხეშია.
პოლიციის მაღალჩინოსნების განცხადებით ისინი ახლოს არიან მთავარი შემკვეთის გამოვლენასთან და ჟურნალისტის მკვლელობაში მონაწილე ყველა პირის დაკავება მხოლოდ დროის საკითხია.
მოპოვებული მტკიცებულებების საფუძველზე წინასწარი ვარაუდით და დიდი ალბათობით ცნობილი ჟურნალისტის მკვლელობა შეიძლება უკავშირდებოდეს საბერძნეთში ბოლო წლებში მოქმედ კრიმინალურ დაჯგუფებებს.
როგორც ირკვევა ჟურნალისტს ჰქონდა გარკვეული ინფორმაცია და კონკრეტული მტკიცებულებები, რომელთა გამჟღავნებაც გარკვეული პირების ინტერესებში არ შედიოდა.
რაც შეეხება იმას, რომ პირველი დაკავებები გამოცხადდა ჟურნალისტის მკვლელობიდან მხოლოდ ორი წლის შემდეგ, პოლიციის მაღალჩინოსნების განმარტებით ეს დაკავშირებულია მხოლოდ და მხოლოდ იმ ფაქტთან, რომ ჩასატარებელი იყო საფუძვლიანი გამოძიება, გასაანალიზებელი იყო 350-ზე მეტი ვიდეო და რაც მთავარია, უკვე დაკავებული ორი პირი სასამართლო პროცესზე უნდა წარმდგარიყო საქმის დადასტურებული მასალებით, არა ვარაუდებით არამედ მტკიცებულებებით, რასაც გარკვეული დრო ჭირდებოდა.
ჟურნალისტის მკვლელობის დაგეგმვის და აღსრულების ყველა საფეხური დეტალურად არის გაანალიზებული ატიკის უსაფრთხოების დეპარტამენტის მიერ მოპოვებული მასალებისგან შედგენილ მრავალგვერდიან საქმეში, რომელსაც პრესა აქვეყნებს.
