კორიდალო: უცნობმა მამაკაცმა ახალგაზრდა ქალებს, რომლებიც ბავშვებთან ერთად იმყოფებოდნენ, ცეცხლსასროლი იარაღიდან ესროლა

გუშინ შუადღისას კორიდალოში, ავტომანქანაში მყოფი უცნობი  მამაკაცი 22 და 27 წლის ორ ახალგაზრდა დედას მიუახლოვდა, რომლებიც ბავშვებთან ერთად იმყოფებოდნენ შემთხვევის ადგილზე და  სრულიად მოულოდნელად ცეცხლსასროლი  იარაღიდან მათი მიმართულებით ისროლა,  რის შედეგადაც 2 და 3 წლის სამი ბავშვი დაშავდა, რომლებიც ატიკის  საავადმყოფოს სასწრაფო დახმარების განყოფილებაში გადაიყვანეს.

როგორც ექიმებმა დაადგინეს, სამივე ბავშვს აღენიშნებოდა მრავლობითი დაზიანებები, ტყვიის ნამსხვრევებმა  შეაღწიეს კანში ზურგზე, მკლავებზე და თავის არეში ზედაპირულად.

მედიკოსების განმარტებით მიღებული დაზიანებები მსუბუქია და ბავშვების სიცოცხლეს საფრთხე არ ემუქრება, ისინი ფაქტობრივად პროფილაქტიკური  მიზნით შეიყვანეს პედიატრიული ქირურგიის კლინიკაში და დღეს გაწერეს.

დედებმა პოლიციაში თავდამსხმელის და მისი ავტომანქანის აღწერითი ჩვენება მისცეს, რის შემდეგაც  მიმდინარეობს აღნიშნული პიროვნების ძიების ოპერაცია.