კრიტი: დედამ ოთხი წლის ბავშვი მარტო დატოვა სასტუმროში და თვითონ ექიმთან წავიდა
შაბათს შუადღისას კრიტზე, ხანიაში, პოლიციამ იპოვა და განყოფილებაში გადაიყვანა 4 წლის ბავშვი, რომელიც სრულიად მარტო გადაადგილდებოდა მალემის სანაპიროზე.
დიდი ხნის მანძილზე უმეთვალყურეოდ მოსიარულე პატარა ბიჭი, რომელსაც მხოლოდ პამპერსი ეცვა და ხელში მობილური ტელეფონი ეკავა, თავდაპირველად დანიელმა ტურისტებმა შეამჩნიეს და დაუყოვნებლივ შეატყობინეს პოლიციას, რის შემდეგაც ადგილზე მისულმა თანამშრომლებმა ბავშვი განყოფილებაში გადაიყვანეს და დაიწყეს მისი მშობლების ძებნა.
პოლიციამ მოკლე ხანში შეძლო ბავშვის დედის პოვნა და კითხვაზე, თუ რატომ დატოვა შვილი მარტო, პასუხი იყო შოკისმომგვრელი.
33 წლის ქალმა, რომელიც რუმინეთის მოქალაქეა, პოლიციისთვის მიცემულ ჩვენებაში განაცხადა, რომ საბერძნეთში ტურისტული მიზნით იმყოფება და რადგან ექიმთან გადაუდებელ ვიზიტს საჭიროებდა, შვილი მარტო დატოვა სასტუმროში, სადაც ისინი ცხოვრობენ, მაგრამ ბავშვმა შეძლო სასტუმროდან გასვლა და სანაპიროზე დადიოდა.
33 წლის ქალი დააკავეს და მის წინააღმდეგ საქმე ბავშვის საფრთხის ქვეშ დაყენების ფაქტზე აღიძრა. როგორც გაირკვა ბავშვის მამა საბერძნეთში არ იმყოფება, ამიტომ პატარა ისევ დედას გადასცეს.
