მოთხოვნები, რომლებსაც 2026 წლის ბოლოდან ევროპაში მოძრავი ავტომანქანები უნდა აკმაყოფილებდნენ
მოთხოვნები, რომლებსაც 2026 წლის ბოლოდან ევროპაში მოძრავი ავტომანქანები უნდა აკმაყოფილებდნენ
ევროკავშირში 2026 წლის 29 ნოემბრიდან ახალი ავტომობილებისთვის ამოქმედდება გამონაბოლქვის სტანდარტი Euro 7, რომელიც მიზნად ისახავს ჰაერის დაბინძურების შემცირებას და უფრო ეკოლოგიური ტრანსპორტის განვითარებას.
ახალი რეგულაციები შეეხება მხოლოდ ახალ მოდელებს. უკვე რეგისტრირებული ან Euro 5/Euro 6 სტანდარტის მქონე ავტომობილების გამოყენება და გაყიდვა მფლობელებს ჩვეულებრივად შეეძლებათ და მათზე დამატებითი ცვლილებები არ გავრცელდება.
Euro 7 ძირითადად ამკაცრებს არა მხოლოდ გამონაბოლქვის კონტროლს, არამედ მისი გაზომვის წესებსაც. ავტომობილები შემოწმდება რეალურ საგზაო პირობებში, ხოლო კონტროლი გავრცელდება ასევე მუხრუჭებისა და საბურავების ცვეთის შედეგად წარმოქმნილ ნაწილაკებზეც.
ახალი მოთხოვნები შეეხება ელექტრომობილებსაც: მათი ბატარეა უნდა ინარჩუნებდეს მინიმუმ 80%-იან სიმძლავრეს 5 წლის ან 100 000 კმ-ის შემდეგ, ხოლო 72%-ს 8 წლის ან 160 000 კმ-ის შემდეგ. ასევე შემოვა ავტომობილის ციფრული „პასპორტი“, სადაც აისახება მოხმარების, სვლის მარაგისა და ბატარეის მდგომარეობის ინფორმაცია.
2027 წლის 29 ნოემბრიდან ახალი ავტომობილების პირველადი რეგისტრაცია შესაძლებელი იქნება მხოლოდ Euro 7-ის შესაბამისი მოდელებისთვის. ექსპერტების შეფასებით, ეს მნიშვნელოვნად შეცვლის ავტომობილების ბაზარს, გაიზრდება ტექნოლოგიური სირთულე და შესაძლოა შემცირდეს ზოგიერთი ძველი მოდელის ხელმისაწვდომობა.
