მძიმე ავტოსაგზაო შემთხვევა თესალონიკში-გარდაცვლილია 40 წლის ქალი
ოთხშაბათს შუადღისას თესალონიკში მძიმე ავტოსაგზაო შემთხვევა მოხდა. მართვადაკარგული საქალაქო ავტობუსი მოძრაობის საპირისპირო ზოლში გადავიდა და მსუბუქ ავტომანქანებს და ფეხით მოსიარულეს შეეჯახა. შედეგად გარდაცვლილია 40 წლის ქალი, 3 წლის გოგონას დედა.
40 წლის ქალი სამსახურიდან სახლში ელექტროსკუტერით ბრუნდებოდა, უეცრად დაინახა მისკენ მომავალი ავტობუსი და მან რეაგირება ვერ მოასწრო. ინციდენტის თვითმხილველები აცხადებენ, რომ მსხვერპლს ჩაფხუტი ეკეთა, თუმცა ავტობუსმა ფაქტიურად ზედ გადაუარა, რის შედეგადაც ქალი მყისიერად გარდაიცვალა.
შემთხვევის თვითმხილველები ამბობენ, რომ მათ დაინახეს ავტობუსი, რომელიც შედიოდა მონასტირის ქუჩაზე მოძრაობის საპირისპირო მიმართულებით, მძღოლი კი საჭეზე იყო გადაწოლილი, შემდეგ კი ის შუქნიშანზე გაჩერებულ მანქანებს შეეჯახა.
გავრცელებული ინფორმაციით, საქალაქო ავტობუსის მძღოლი ანაგენისის ქუჩიდან მონასტირის ქუჩაზე გადახვევის მიზნით დასავლეთის მიმართულებით მოძრაობდა, რა დროსაც სავარაუდოდ გონება დაკარგა. ამის შემდეგ მართვადაკარგული ავტობუსი საპირისპირო ნაკადში შევიდა და ელექტროსკუტერს, ტაქსს და კიდევ სხვა ავტომობილს შეეჯახა.
მძღოლი სასწრაფო დახმარების ბრიგადამ სალონიკის იპოკრატეოს საავადმყოფოში გადაიყვანა. როგორც ირკვევა, მომხდარიდან ცოტა ხნით ადრე მან ექიმებს შეატყობინა, რომ თავს ცუდად გრძნობდა. 43 წლის მძღოლს ჩაუტარდა გამოკვლევების სერია, რომელიც აჩვენებს რამ გამოიწვია მძღოლის გონების დაკარგვა და შედეგად მძიმე ავარია.
