პიერია: თვითმფრინავის ჩამოვარდნის შედეგად 2 ადამიანი დაიღუპა
პიერია: თვითმფრინავის ჩამოვარდნის შედეგად 2 ადამიანი დაიღუპა
პიერიაში, კონდარიოტისას დასახლებასთან კვირას, 18 ოქტომბერს, ერთძრავიანი მსუბუქი თვითმფრინავი ჩამოვარდა, რის შედეგადაც ბორტზე მყოფი ორი ადამიანი დაიღუპა.
საბერძნეთის სახანძრო სამსახურის ინფორმაციით, შემთხვევის შესახებ შეტყობინება დაახლოებით 13:50 საათზე შევიდა. თვითმფრინავი მდინარის მშრალ კალაპოტში, პიერიის აეროკლუბის ასაფრენ-დასაფრენ ზოლთან ახლოს აღმოაჩინეს.
ბორტზე მყოფი 55-დან 60 წლამდე ასაკის ორი მამაკაცი მაშველებმა უგონო მდგომარეობაში იპოვეს. ისინი უსაფრთხო ადგილას გადაიყვანეს, საიდანაც სასწრაფო დახმარების ბრიგადებმა კატერინის საავადმყოფოში გადაიყვანეს. ექიმებმა ორივე მგზავრის გარდაცვალება დაადასტურეს.
შემთხვევის ადგილზე 8 მეხანძრე და 4 სახანძრო მანქანა მუშაობდა. თვითმფრინავის ჩამოვარდნას ხანძარი არ მოჰყოლია.
ამ დროისთვის ავიაკატასტროფის გამომწვევი მიზეზები უცნობია. შემთხვევის გარემოებების დასადგენად შესაბამისი პროცედურები მიმდინარეობს.
