პროგრამა „პროლამვანო“ 2030 წლამდე გაგრძელდება
პროგრამა “პროლამვანო” 2030 წლამდე გაგრძელდება
საბერძნეთის ჯანდაცვის მინისტრის მოადგილემ, ირინი აღაპიდაკიმ განაცხადა, რომ პრევენციული ჯანდაცვის სახელმწიფო პროგრამა „Προλαμβάνω“ („პროლამვანო“) 2030 წლამდე გაგრძელდება. მინისტრის მოადგილის თქმით, პროგრამა მხოლოდ დაფინანსების წყაროს იცვლის და აღდგენის ფონდიდან სახელმწიფო ბიუჯეტზე გადადის.
აღაპიდაკიმ აღნიშნა, რომ სექტემბრიდან მოქალაქეები კვლავ მიიღებენ შეტყობინებებს უფასო პროფილაქტიკურ გამოკვლევებზე. პროგრამა მოიცავს საშვილოსნოს ყელის, ძუძუსა და მსხვილი ნაწლავის კიბოს, ასევე გულ-სისხლძარღვთა დაავადებების პრევენციულ სკრინინგს.
მინისტრის მოადგილემ ასევე ისაუბრა კუნძულებზე სამედიცინო პერსონალის დეფიციტზე. მისი განცხადებით, ექიმები, რომლებიც დასაქმდებიან კუნძლებზე წახალისდებიან ფინანსურად, ხოლო საცხოვრებლის პრობლემის მოსაგვარებლად სახელმწიფო ითანამშრომლობს ადგილობრივ თვითმმართველობებთან და კერძო სექტორთან. პატარა კუნძულებზე მომუშავე ექიმები დამატებით 1 500 ევროს მიიღებენ, ხოლო რიგ რეგიონებში მათ ქირის სუბსიდირებას ან უფასო საცხოვრებელს სთავაზობენ.
გარდა ამისა, დასრულდა მობილური ჯანდაცვის ჯგუფების მომზადება ახალი ტელემედიცინის ტექნოლოგიების გამოყენებაში. სპეციალური პორტატული აღჭურვილობის საშუალებით შესაძლებელი გახდება პაციენტის სახლში ჩატარდეს სხვადასხვა გამოკვლევა, მათ შორის ულტრაბგერითი კვლევა, ელექტროკარდიოგრამა და კანის ხალების შეფასება. ყველა შედეგი ავტომატურად აიტვირთება ჯანმრთელობის ეროვნულ ელექტრონულ სისტემაში, რაც ექიმებს დისტანციურად კონსულტაციისა და სწრაფი დიაგნოზის დასმის შესაძლებლობას მისცემს.
ირინი აღაპიდაკიმ ასევე გააკრიტიკა ოპოზიცია და აღნიშნა, რომ ბოლო წლებში პრევენციული ჯანდაცვის მიმართულებით არაერთ მნიშვნელოვან საკანონმდებლო ინიციატივას მათ მხარი არ დაუჭირეს. მისი თქმით, პრევენცია უნდა იყოს საერთო ეროვნული პრიორიტეტი და არა პოლიტიკური დაპირისპირების საგანი.
