საბერძნეთი: ძველი ავტომანქანებისთვის შეზღუდვები წესდება
საბერძნეთი: ძველი ავტომანქანებისთვის შეზღუდვები წესდება
ტრანსპორტის თითქმის 45%, რომელიც საბერძნეთში მოძრაობს, 10-12 წელზე მეტის არის, ხოლო მსუბუქი ავტომობილების საშუალო ასაკი 17,5 წელს აღწევს, რაც ევროკავშირის ქვეყნებს შორის ყველაზე მაღალი მაჩვენებელია. გამომდინარე აქედან საბერძნეთის სახელმწიფომ უახლოეს წლებში ძველი ავტომობილების მფლობელებს შესაძლოა ეტაპობრივად უფრო მკაცრი შეზღუდვები დაუწესოს.
ევროკავშირი აქტიურად უწყობს ხელს დაბალი ემისიების ზონების გაფართოებას და ჰაერის დაბინძურების შემცირების მიზნით ახალი რეგულაციების დანერგვას. ეს არ ნიშნავს რომ ძველი ავტომობილების მოძრაობა ერთბაშად აიკრძალება, თუმცა მათი გამოყენება თანდათან უფრო დიდ ხარჯებთან იქნება დაკავშირებული.
საწყის ეტაპზე განიხილება ქალაქების გარკვეულ ნაწილებში გადაადგილების შეზღუდვა, ძველი ავტომობილებისთვის უფრო მაღალი გადასახადების დაწესება და ტექნიკური შემოწმებების გამკაცრება. განსაკუთრებით ეს შეეხება Euro 4-ისა და უფრო ძველი სტანდარტების ავტომობილებს.
ექსპერტები მიიჩნევენ, რომ სახელმწიფომ პარალელურად უნდა უზრუნველყოს ძველი ავტომობილების ჩანაცვლების ხელშეწყობა. მათ შორის, სუბსიდიებითა და შეღავათიანი დაფინანსებით, რათა მოსახლეობისთვის ეკოლოგიურ ტრანსპორტზე გადასვლა ნაკლებად მძიმე ფინანსურ ტვირთად იქცეს.
აღსანიშნავია, რომ ამ ეტაპზე საბერძნეთში არ არსებობს გადაწყვეტილება, რომელიც ძველი ავტომობილების მოძრაობის აკრძალვას ითვალისწინებს. საუბარია ექსპერტების შეფასებებსა და ევროკავშირის ეკოლოგიური პოლიტიკის შესაძლო გავლენაზე, რის შედეგადაც მომდევნო წლებში ძველი ავტომობილების გამოყენება შესაძლოა ეტაპობრივად უფრო შეზღუდული და ეკონომიკურად ნაკლებად მომგებიანი გახდეს.
