საბერძნეთში კიბერუსაფრთხოების ახალ ცენტრს ხსნიან
საბერძნეთში კიბერუსაფრთხოების ახალ ცენტრს ხსნიან
საბერძნეთში 22 ივნისს ოფიციალურად გაიხსნება ქვეყნის შეიარაღებული ძალების გენერალური შტაბის ინფორმატიკისა და კიბერსივრცის დირექტორატის ახალი, თანამედროვე შენობა. გახსნის ცერემონიას პრემიერ-მინისტრი კირიაკოს მიცოტაკისი, თავდაცვის მინისტრი ნიკოს დენდიასი და სამხედრო ხელმძღვანელობა დაესწრებიან.
2 500 კვადრატული მეტრის ფართობის შენობა, რომლის მშენებლობაც 2024 წლის დეკემბერში დაიწყო, ქვეყნის „ციფრული ფარის“ მთავარ ოპერატიულ ცენტრად იქცევა. აქ განთავსდება საერთაშორისო სტანდარტების შესაბამისი ინფრასტრუქტურა, მათ შორის კიბერუსაფრთხოების ოპერაციების 24-საათიანი ცენტრი.
ახალი კომპლექსი ასევე მოიცავს ხელოვნური ინტელექტისა და მონაცემთა ანალიზის სპეციალიზებულ განყოფილებებს, რაც საბერძნეთის შეიარაღებულ ძალებს თანამედროვე კიბერსაფრთხეებთან გამკლავების შესაძლებლობებს მნიშვნელოვნად გაუძლიერებს.
დირექტორატი დაკომპლექტებულია ინფორმაციული ტექნოლოგიების სფეროში გამოცდილი სპეციალისტებით რაც ქვეყნის თავდაცვის სისტემის ციფრული შესაძლებლობების განვითარების მნიშვნელოვან ნაბიჯად მიიჩნევა.
