ტრაგედია იტალიაში: გარდაიცვალა ერთი წლის გოგონა, ბავშვი მამას ავტომანქანაში დაავიწყდა
იტალიაში, რომის სამხრეთით, ჩეჩინიოლას რაიონში ერთი წლის გოგონა მანქანაში გარდაცვლილი იპოვეს.
იტალიური მედიის ცნობით მამა, რომელიც პოლიციელია, დილით სამსახურში წასასვლელად სახლიდან გავიდა ბავშვთან ერთად, რომელიც საბავშვო ბაღში უნდა მიეყვანა.
შუადღისას, ბავშვის გამოსაყვანად მისულ დედას უთხრეს, რომ იმ დღისით ბავშვი საბავშვო ბაღში არ მიუყვანიათ.
ქმრის სამუშაო საბავშვო ბაღის გვერდით იყო და როგორც ჩანს, როდესაც მამამ ავტომანქანა სკოლამდელი დაწესებულების გარეთ გააჩერა, მას დაავიწყდა ბავშვის გადმოყვანა, რის გამოც ის საათების განმავლობაში ავტომანქანაში ჩაკეტილი გარდაიცვალა.
ტრაგიკული მომენტი დადგა, როდესაც დედამ საბავშვო ბაღიდან გამოსვლისას ქმრის გაჩერებული მანქანა შენიშნა, რომელშიც ბავშვი იყო. შეშინებული მივარდა, გამვლელების დახმარებით ფანჯარა ჩაამტვრია და ბავშვი გაათავისუფლა, თუმცა უკვე გვიანი იყო, რადგან პატარა გოგონა უკვე გარდაცვლილი იყო .
ადგილზე მისულმა მაშველებმა პატარა ბავშვის გარდაცვალება დაადგინეს. შოკში მყოფი მშობლები ვერ იჯერებენ მომხდარ უბედურებას. ამჟამად პოლიცია ტრაგედიის ფაქტზე გამოძიებას აწარმოებს.
